Lezok urriaren 25, 26 eta 27an antzerki talde amateurren lehen topaketa hartuko du, Gezala Auditorioan esperientziak partekatzeko eta antzerki emanaldiak eskaintzeko asmoz. Jardunaldi horietan, antzezpenez gain, lan-bilerak eta tailerrak egingo dira konpainia parte-hartzaileen artean.
Ekitaldi honetan euskal antzerkiaren testuinguruan ibilbide luzea duten Zurriola, Aleka, Karrika eta Goaz antzerkui talde amateurrak hartuko dute parte eta, umorea eta feminismoa barne hartzen dituzten gai garaikideak biltzen dituen antzerki-eskaintza zabala aurkeztuko dute. Jarduera guztiak euskaraz egingo dira.
Jon Legorburu Lezoko Kultura zinegotziak aurkezpenean azpimarratu duenez, topaketa hau oso garrantzitsua da, ez bakarrik Lezo antzerki amateurraren munduan erreferente gisa kokatzeko, baizik eta baita bere obrak antzezteko zailtasunak dituzten konpainia hauentzako zirkuitu kultural bat sortzeko ere. "Horrelako topaketak funtsezkoak dira euskararen erabilera sustatzen dutelako eta gure herrian kultur korronte garrantzitsua sortzen dutelako", azpimarratu zuen Legorburuk.
Aurkezpenean Xanti Val Lezoko Udaleko kultur teknikariak eta Edurne Agirrezabala eta Leire Fresnedo Lezoko Orratx Antzerki Taldeko ordezkariek ere parte hartu zuten. Horiek ere nabarmendu zuten topaketa hauek oso garrantzitsuak direla antzerki amateurraren hazkunderako eta ikusgarritasunerako.
Emanaldietarako sarrerek 5 euroko kostua izango dute emanaldi bakoitzeko. Horrez gain, 10 euroko bonu berezi bat jarri da eskuragarri, Antzerki Ametsetan Lezoren lehen edizio honetako lau obrez gozatzeko.
