Tomas Garbizu Lezoko Udal Musika Eskolan 2025-2026 ikasturtean izena emateko epea datorren astean zabalduko da. Zehazki, irailaren 1etik 5era 10:30tik 13:00etara eman ahal izango dute izena datorren ikasturtean musikako adar ezberdinetan murgildu nahi duten pertsonek.
Aurreko ikasturte amaieran matrikula egiteko lehen epea zabaldu zuen Tomas Garbizu musika eskolak. Datorren astean, bigarren epea irekiko du, astelehenetik ostiralera. Interesdunek musika eskolan bertan eman ahal izango dute izena, 10:30tik 13:00etara bitartean 2025-2026 ikasturtean ikasteko.
Urtero moduan, musika tresna eta diziplina ugarik osatuko dute Tomas Garbizu Lezoko Udal Musika Eskolako eskaintza, adin guztietarako eta musika adar desberdinetan aritu nahi duen pertsona ororentzat egongo baita aukera. Bigarren epe honetan oraindik hainbat instrumentu eta bestelako ikastarotan eman ahalko da izena.
Panderoa, klarinetea, saxofoia, txistua, biolina, biola eta tronpeta ikasteko lekuak badaude oraindik.
Bestalde, formazio osagarrien artean, Musika eta Mugimendua, Musika Mintzaira, Hezkuntza Musikala, Talde Instrumentala eta Talde Korala egiteko aukera gelditzen da oraindik.
Agerikoa da Tomas Garbizu Musika Eskolan adin eta maila guztietako pertsonek dutela lekua, musikazaleek ikasteko eta gozatzeko aukera izango dute hurrengo ikasturtean. Izan ere, Tomas Garbizu Musika Eskola musika heziketan erreferente bezala finkatu da, kalitatezko hezkuntza eskainiz eta ikasleen garapen artistikoa sustatuz.