Lezoko Udaletxeko Biltzar Areto Nagusian, 2003ko apirilaren 30an, 19:15 orduetan eratu da OSOKO UDALBATZA, EZOHIKO ETA PREMIAZKO BILKURA egiteko xedez, lehen deialdian, Aitor Sarasola Salaberria (Batasuna) alkatearen lehendakaritzapean eta ondorengo zinegotzi hauek bertan direla: Mikel Mitxelena Iza (Batasuna), Imanol Esnaola Arbiza (Batasuna), Juli Del Sol Bermejo (Batasuna), Iñaki Labaka Loperena (Batasuna), Inmaculada Muñoz Martinez (Batasuna), Pello Garbizu Azkue (EAJ), eta Iñake Urrestarazu Azurmendi (EA ).
Ez dira bilkurara etorri: Iñaki Zabaleta Zabala (Batasuna), Jesús Mª Martiarena Jaka (EAJ), Mikel Antxon Arrizabalaga Brusin (PSE), Ainhoa Villanúa Ayuela (PSE) eta Gurutze Sein Cordero (EA)
Bertan da eta egintzaren fede eman du Xabier Loiola Aristi, udal idazkariak.
1.- Deialdiaren premiazkotasuna berrestea.
Alkateak arrazoitzen du urgentzia: atzo goizaldeko polizia operazioaren ondorioz Udalbiltzaren bulegoak itxi zirelako eta zortzi atxiloketa egon zirelako, eta Lezoko udala partzuergo horren partaide delako.
Osoko bilkurara bertaratu diren zortzi zinegotzien aldeko botoarekin bileraren premiazkotasuna berretsi da.
2.- Udalbiltzaren aldeko mozioa.
Alkateak Udalbiltzaren mozioa azaldu du. Honela dio mozioak hitzez hitz :
Udalbiltzaren adierazpena eta bozkatzeko mozioa:
"Bart goizaldean, iluntasunean babesturik, Espainiako "justiziak" Udalbiltza desegiteko lanari ekin dio. Epaile arrotz baten aginduz eta atzerriko polizi indarren bitartez, hainbat euskal hautetsi eta Udalbiltzako langile zenbait atxilotu dituzte. Horrezaz gain, Bizkaia, Araba, Nafarroa Garaia eta Gipuzkoako egoitzak dokumentazioz hustu eta egoitzak itxi dituzte.
Udalbiltzak udalak eta udal hautetsiak biltzen ditu. Gaur gaurkoz Udalbiltza da Euskal Herri osoa biltzen duen izaera nazionaleko instituzio bakarra. Gure herriaren izaera ukatu duten indarren betidaniko helburua izan da Herri honek instituzio nazionalik ez izatea.
1999an Udal Hautetsiek Udalbiltzaren sorrerarekin Euskal Herri osoa bere baitan biltzen zuen instituzioa sortzeko pausu historikoa eman zuten. Pauso horri esker urte hauetan nazio mailako instituzionalizazio prozesu bat abian jarri dugu.
Horren babesean Udalbiltzak ( eta baita eragile sozial, sindikal eta politikoek ere) mahai gainean gure herriak bizi duen gatazkari konponbidea bilatzeko funtsezko proposamenak jarri ditu mahai gainean. Aipa ditzagun horien artean batez ere: Euskal Herriaren Eskubideen Karta ( Herri honen eta bere herritarren eskubideak aitortzen dituena ); Euskal Herria bakea eta demokraziaren bidean jartzeko proposamena (Gatazkaren konponbiderako oinarriak proposatzen dituenak) edo nazio eztabaida gunea (Herri honek bere geroa erabakitzeko bazterketarik gabeko eztabaida- gunea).
Urrats horiek edo antzeko beste batzuk ezinbestekoak dira Herri honek behar duen behin betiko konponbidera iristeko. Estatu espainola ematen ari den urratsekin argí adierazi zaio herri honi ez duela ezer aldatzeko borondaterik. Gerra eta sufrimenduaren bidez herri hau desegiteko erabaki zaharra gauzatzeko ahaleginean ari da. Estatu espainola Euskal Herriak bere burua subjektu polítiko gisa egituratzeko ahalegin guztiak zapuzten ihardun da. Udalbiltza sortu zenetik lau urte joan dira eta urte hauetan eraso horiek etengabekoak izan dira.
Urrats hau, azken hilabeteotan Estatu espainolak eman dituen beste batzuekin kateaturik dator. Euskal Herriaren nazio izaera ukatzearekin batera, euskal herritarrek bere ordezkaritza demokratikoki hautatzeko duten eskubidea indarrik gabe utzi nahi da, eta horrekin batera biltzeko eskubidea, bizitza publikoan parte hartzekoa, bozkatzekoa, adierazpen askatasuna...
Eraso honek, beraz, Euskal Herriak bere buruari eman dion, eta herri baten bizitzarako ezinbestekoa den instituzionalizazioa desegitea du helburu Euskal Herriaren beraren izaera ukatzen eta desegiteko ahaleginetan ari dira.
Hori guztia kontutan hartuta, Udal Batzar honi honako puntuok proposatzen dizkiogu:
1. Udal Batzar honek berretsi ditzala Udalbiltzaren sorreran Udal Hautetsiek bere egindako bost ardatzak (1.999ko Otsailaren 6ean Iruñean onartua):
1. Euskal Herria nazio bat dela aldarrikatzea
2. Euskal Herriaren egitura politikoa eraikitzeari laguntza ematea, lurraldetasunaren lekuko izanik eta zazpi euskal herrialdeetako udal ordezkariak esparru erkidean hartzeko asmoz.
Euskal Herriaren nazio eraikuntza bultzatzea, prozesu dinamiko eta demokratiko gisa ulerturik eta Euskal herritar guztien erabakimen eta partehartze askean oinarriturik.
3. Instituzio iraunkorra izateko asmoarekin jaio da; borondatea pilatu eta batzeko sortua da. Izan ere instituzioa nazio esparruko denez, Euskal Herriko antolakuntza instituzional zein politikoa egituratzen sortu beharreko azterketa eta eztabaidak bultzatuko ditu dinamika politikoarekin bat eginez.
Egituratze honen zehaztasunak prozesu demokratiko baten menpean adostu beharko dira, non euskaldunen partehartzea funtsezkoa litzateke eta herrialde historiko guztien eraentza errespetatuko lirateke.
4. Herrialde guztietako udalerrien arteko harremanak eraikitzen laguntzea. Instituzioa zabalik dago Euskal Herriko erkidego naturalean bere jarduera garatzen duen hautetsi guztientzat politika, kultur soziologi eta ekonomi erkidego gisa definitzen gaituzten lan eta lankidetza esparru guztien inguruko ekintza bateratua ahalbideratuz. Esparruok ondokoak dira, besteak beste: hizkuntza, kultura, kirola, ingurugiroa, lurraldearen antolaketa, ekonomi garapena, ongizatea....
Lehendabizi, Euskal Herriari buruzko diagnostiko oinarrizkoa egingo litzateke: geroago, nazio eraikuntzaren arazo eta erronka erkideei modu bateratu eta homogeneoan egingo litzaieke aurre, eta proposamen zehatzak beste esparru instituzional batzuei, gizarte mugimenduei, erakundeei... bideratuko litzaieke.
5. Nazioartean, Euskal Herria nazio berezkoa eta desberdindua dela adieraztea, baita Euskal Herriak nazio gisa ihardun nahi duela Europako geroko egituraketan eta instituzioetan ere.
2. Euskal Herriaren aitortza ekarriko duen dinamika nazionalen aldeko apustua egin dezala (Maila instituzional, ekonomiko, sozial edo kulturalean), horrek soilik ekarriko baitu gure herriak bere geroa ziurtatzeko behar duen aitortza, eta gatazkaren konponbide demokratikoa.
3. Herritarrak dei ditzala hilaren 30ean, arratsaldeko 8:00etan udaletxeen aurrean ordu erdiz egingo diren bilkuretan parte hartzera."
Pello Garbizuk ordezko proposamena aurkeztu du EAJ eta EAren izenean. Erabaki proposamenak berdinak omen dira ez ordea sarrera edo motibazioa. Honela dio emendakinaren sarrerak:
"Apirilaren 29an ezker abertzalearen Udal Hautetsien Batzarraren aurka operazio poliziala burutu da. Berriro ere, beste eraso baten aurrean aurkitzen gara, estrategi jakin baten parte den erasoa. Bide horretatik, Euskal Herrian geroz eta enfrentamendu handiagoa sortzen duena eta sortuko duena, desestabilizazioa eta tentsioa areagotuz.
Operazio juridiko-politiko hau zuzen zuzenean ideologia askatasunaren kontra dijoa, proiektu politikoak defendatu eta zabaltzeko hesiak ipiniaz eta aniztasun politikoa ukatuaz.
Horretaz gain, erabat onartezina da Udalbiltza ETAren aginduz sortua izan den Erakundea dela leporatu nahi izana. Azkenaldi honetan gertatzen ari denari jarraituaz, aberri eraikuntza, euskara, eta orohar euskaldun izatearekin zerikusia duen oro delitu bihurtzeko dinamika maltzur baten aurrean aurkitzen gara."
Luze hitz egin ondoren erabaki proposamenak berberak direnez haien bozketa egitea onartu dute guztiek, alderdi bakoitzak proposatutako sarrera edo aitzin solasa bakoitzaren balorazio edo motibazio gisa jasoz aktan.
Hori argitu ondoren erabaki proposamenak ahobatez onartu dira.
Aktaren amaiera.
Beste aztergairik geratzen ez denez, alkate-lehendakariak 19:40 orduetan eman dio buru bilkurari. Eta nik, idazkari naizen aldetik, akta 310.558.etik 310.561.era arteko zenbakiak dituzten orri ofizialetan jaso eta horren guztiaren fede ematen dut, eta bilkuran izan diren zinegotzi guztiek izenpetu egin dute akta hau.