2008.eko Abenduaren 23ekoa

Lezoko Udaletxeko Biltzar Areto Nagusian, 2008ko abenduaren 23an, 18:35etan eratu da OSOKO UDALBATZA, EZOHIKOA ETA PREMIAZKOA egiteko xedez, lehen deialdian, Haritz Salaberria Goikoetxea alkatearen lehendakaritzapean eta ondorengo zinegotzi hauek bertan direla: Haritz Salaberria Goikoetxea, Irati Aranburu Salaberria, Jon Legorburu Arrastua, Silbia Folgueira Fernández, María Pilar Legorburu Echegaray, Urko Lopetegi Campano, Jaione Lekuona Irazusta,

Ez dira azaldu Iñigo Esnaola Arbiza, Kepa Garbizu Azkue, Enrique Figueroa Laboa, Jesús María Martiarena Jaca, Miguel Antonio Arrizabalaga Brusín eta Roberto Sánchez Sánchez.

Bertan da eta egintzaren fede eman du udal idazkaria den Xabier Loiolak.

1.- Deialdiaren urgentzia berrestea.

Alkateak dio plenoa deitu duela lezoarra den June Villarrubiak salatu dituen torturak direla eta. Horretan justifikatu du deialdiaren urgentzia.

Osoko bilkurara etorri diren zinegotzi guztien adostasunarekin deialdia berretsi da.

2.- June Villarrubiak jasandako torturak direla eta, mozioa.

Irati Aranburu zinegotziak irakurri du mozioa:

"June Villarrubia, eta berarekin batera atxiloturiko Arkaitz Landaberea, Julen Etxaniz eta Saioa Urbistazuren atxiloketek. Eta ondoren jasan dituzten torturek gurean agerian utzi dute, berriro ere, gatazkaren gordintasuna.

Zoritxarrez luzea da Euskal Herriak jasan behar izan duen Torturaren historia, frankismo ilunetik jarraipen osoa izan duena. 1978tik aurrera 7.000 euskal herritar baino gehiagok salatu dituzte Guardia Zibila, Espainiar Polizia Nazionala edota Ertzaintzaren eskuetan jasandako Torturak.

Espainiar Estatuak etengabe eta sistematikoki erabili izan du eta erabiltzen du Tortura Euskal Herriko eskubideen aldeko borroka eta lan ezberdinetan antolaturiko herritarren aurka. Argia ikusi duten kasuak, proiekzio mediatikoa izan dutenak, salbuespenak ditugu. Izeberg handi baten punta txikia besterik ez dira. Milaka tortura kasu dira isiltasunak ezkutatuak.

Tortura Estatu batek bere indar eta inpunitate osoz herritar babesgabetuaren aurka ezartzen duen bortizkeria da. Torturaren atzean Estatuko aparatu guztiak daude, polizia indarrak tortura gauzatzen, gobernua agintzen, legislatiboa tortura ahalbidetzen duten legediak onartzen, justizia aparatuak inpunitatea bermatzen. Guardia Zibilak PSOEren gobernuaren aginduz torturatzen du, espainiar kongresuak onetsitako inkomunikazioa erabiliz, Audientzia Nazionala inpunitatea bermatzen du.

Honela aurreko asteko asteartean atxilotu eta berehala beren defentsak torturaren aurkako protokoloa jartzeko eskatu arren Audientzia Nazionaleko epaileak hau ere ukatu egin zien.

Baina bada beste elementu bat Tortura posible egiten duena. Espainiar segurtasun indarren jarduera irmoa eskatzen denean, espainiar Justiziaren jardunari babes osoa agertzen zaionean, eta salaketak isilarazten direnean, Tortura kasu berriak posible egiten dira. Horren arabera neurtzen da alderdi politiko, eragile ezberdin zein komunikabideek Torturaren aurrean duten ardura, baita Torturarekin amaitzeko duten aukera ere.

Espainiar Estatuak, PSOEren gobernuak, Euskal Herriaren aurka darabilen estrategian Torturaren erabilera gordintzea eta areagotzea erabaki du, une politiko jakin batetan eta helburu zehatzarekin: Euskal independentismoa bortizki kolpatzea. Atxiloketak, epaiak eta zigorrak, legez kanporatzeak, baita Torturak ere, Independentziari ateak ixteko, konponbidea ukatzeko, Euskal Herriaren eskubideak jazartzeko erabiltzen ditu.

Torturaren sekuentziari amaiera jarri behar zaio, behingoz eta betiko. Euskal Herrian Torturarekin amaitzeko oihua ozen eta argi entzuten dugu, eragile bakoitzari dagokio bere ardurari eutsi eta Torturarekin amaitzeko neurriak hartzea.

Torturarekin amaitzeko badira gaur bertan hartu daitezkeen benetako neurriak, Espainiar Estatuari, PSOEren gobernuari, euskal herritarren aurka Tortura erabiltzea zailduko diotenak. Tortura salatu eta babesgabetu behar da, torturatzen dutenak argiki salatu behar ditugu, tortura posible egiten duen isiltasuna behingoz apurtu behar da. Baina Torturarekin betiko amaitzeko behar den neurria bestelakoa da, Euskal Herriak bere eskubideak errespetatuak izan behar ditu, Euskal Herriak marko demokratiko bat behar du, euskal herritar bat espainiar zein frantziar polizi indarren eskuetan torturatua izatea ezinezko egingo duen marko demokratiko bat.

Gatazkaren konponbidea demokraziaren aldeko apustu bat eskatzen du, guztion aldetik. Gatazkaren muin politikora jo eta konponbide demokratiko bat eman behar zaio gatazkari. Euskal herritarroi hitza eta erabakia zor zaigu, gure etorkizuna askatasun osoz eta egitasmo politiko guztien artean erabakitzeko eskubidea errespetatzean datza konponbidea.

Hau guztia dela eta, honako mozioa aurkezten dut udal osoko bilkurak eztabaida eta onar dezan:

1. Udal honek irmoki salatzen ditu June Villlarrubiak Guardia Zibilaren esku jasan dituzten Tortura latzak, baita azken urte luzeetan pilatu diren milaka tortura kasuak ere.
2. June Villarrubiari eta senitartekoei gure elkartasuna eta babesa adierazi nahi diegu.
3. Udal honek argi agertu eta salatu nahi ditu Tortura kasu honen atzean dauden ardura guztiak: tortura erabiltzen duten espainiar polizi indarrak, torturak agindu edota baimentzen duen espainiar Gobernua, inpunitate osoa eskaintzen dion Justizia aparatua, baita Tortura kasu hau isilarazten edo justifikatzen saiatu diren alderdi politiko zein komunikabideak ere.
4. Udal honek, euskal herritarrek espainiar polizi indarren eskuetan jasaten duten Torturekin amaitu asmoz honakoa nabarmendu nahi du: euskal herritarrak torturatzen dituzten espainiar polizia indarrek zein inpunitatea bermatzen duen espainiar Justizia aparatuak ez dute Euskal Herrian inolako zilegitasunik. Hortaz, hauei babesa agertzea Tortura ahalbidetzea besterik ekartzen ez duenez, eragile politiko, sozial zein sindikalei babesik ez ematea eskatzen diegu eta behingoz Torturarekin amaitzeko jarrera argia eta beharrezko neurriak har ditzatela.
5. Azkenik, udal honek, Tortura helburu politikoarekin erabiltzen dela salatu nahi du, euskal independentismoaren aurka eta Euskal Herriko eskubideen ukazioa iraunkortu asmoz. Hortaz, udal honek, Torturarekin, eta euskal herritarron eskubide urraketa guztiekin behingoz eta betirako amaitzeko marko demokratiko bat behar dela aldarrikatzen du. Euskal Herriaren eskubideak aitortu eta euskal herritar guztiok gure etorkizuna libreki eta aukera politiko guztien artean erabakitzea bermatua izango dugun marko demokratikoa, hain zuzen ere."

Mozioa bozkatu da eta aho batez onartu.

Aktaren amaiera.

Beste aztergairik geratzen ez denez, alkate-lehendakariak 18:55etan eman dio buru bilkurari. Eta nik, idazkari naizen aldetik, akta 760.999etik 761.001era arteko zenbakiak dituzten orri ofizialetan jaso eta horren guztiaren fede ematen dut, eta bilkuran izan diren zinegotzi guztiek izenpetu egin dute akta hau.