Lezon, mila bederatziehun eta laurogeita hamahiruko maiatzaren hogeitamaikan, hemeretzi orduetan, Udaletxeko Biltzar Areto Nagusian, bildu da Udal Plenoa, egun honetarako deitutako urgentziazko batzarraldi berezia egiteko, lehen deiari erantzunez, Aitor Sarasola Salaberria Alkate J.aren lehendakaritzapean eta ondorengo zinegotzi hauek bertan direla: Josu Mirena Pontesta Garmendia J., Gemma Arrillaga Albisu A., Karmele Legorburu Irazu A., Jose M. Boto Sancho J., Pedro M. Garbizu Azkue J., Jesus Martiarena Jaka J., Jose Antonio Dozagarat Andueza J., Martzial Zabaleta Salaberria J., Pello Garbizu Azkue J., Jose Luis Agirretxe Mitxelena J., Mikel Mitxelena Iza J., eta Iñake Urrestarazu Azurmendi A. .
José Varela Pampin zinegotzi J. ez dago bilkuran.
Idazkari gisa Miren Bruño Azpiroz A., behin behineko funtzionaria, aritu da.
Lehendakaritzak batzarraldia ireki eta publiko deklaraturik eta Idazkaritzak honi hasiera eman ahal izateko beharrezkoa den quoruma badagoela egiaztatu ondoren, aztergai zerrendan sartutako gaiak aztertzeari ekin zaio.
0.- Aztergai diren gaiak premiazko direla baieztatzea.
Aho batez onartu da Udalbatza honetako aztergaia premiazko jotzea.
Batzarrea premiazko jotze horren gainean, Legorburu andrearen saioa aktan josoarazi da, esan baitu gai honen premiazkotasuna utzikeriaz etorri dela, langileek ez dutelako orain artean inoiz planteatu, eta orain Lezoko jaietan ez ohizko batzar bat egin behar izan da.
1.- "Sanitate-Urgazpen Zerbitzua ekainaren 30era arte luzatzeari buruz Udal honetako langileen asanbladak egindako eskaeraren onespen proposamena"
SASFAL-en bidezko osasun laguntzaren prestazioa hilabete batez atzeratzeko eskatuz, langileek eginiko proposamena azterturik, Udalbatzak honako erabakiok hartu ditu, honako quorum hauekin:
Gehiengo osoz, Sarasola, Legorburu, Arrillaga, Pontesta, Mitxelena, Agirretxe, Dozagarat eta Boto jaunen botoak aldeko direla, eta Urrestarazu, Zabaleta, Martiarena eta Garbizurenak kontra:
1. Osasun laguntza zerbitzua ekainaren 30era arte atzeratzeko eskatuz langileen batzarreak egindako proposamena ez onartzea, ekainaren 1etik aurrera funtzionariak Gizarte Segurantzaren Erregimen Orokorrean sartuta gelditzen direlarik.
Gehiengo osoz, Sarasola, Legorburu, Arrillaga, Pontesta, Mitxelena, Agirretxe, Dozagarat, Garbizu, Martiarena, Urrestarazu eta Zabaleta jaunen botoak aldeko direla, eta Boto jaunarena kontra:
2.- Gaixotasuneko bajan dauden langileen, (Patxi Apalategi, J.M. Alonso eta José Cazorla), Fausto Garoña funtzionari pasiboaren egoera, eta tratamendu berezian dauden onuradunen kasuak (erregistratuta daudenak, Nahia Sarasola) tartean direla, Udalak konpromezua hartzen du langile guzti horien tratamendu gastuak ordaintzeko.
Puntu honen gainean honako saio hauek jasoarazi dira:
Urrestarazu andreak esan du langileek eskatutako hilabeteko luzapenarekin konforme dagoela, baina bajan dauden langileen egoerari ere begiratu egin behar zaiola, eta tratamenduan daudenen egoera aztertu egin behar dela; izan ere, batzuk laister bukatuko dute daukaten tratamentua, baina beste batzuena luze joango da. Horregatik, eskatzen duena da hartutako erabakia ahalik eta arinena izatea, eta bajan dagoenarentzat oraingo zerbitzua mantentzea.
Alkateak erantzun dio bajan edo tratamentuan dauden langileak geldituko liratekeen egoerak eta langileen eskakizunak zer ikusirik duten ikusi beharko litzatekeela.
Mitxelena jaunak adierazi du Udaleko langileek egindako eskakizunari lotu behar zaiola. Alde horretatik, esan du, langileek aurkeztu zuten eskaerari (1.go luzapena) heldu behar zaiola, ezer baino lehen zenbait langile (tratamentuan edo bajan zeudenak) zer egoeratan gelditzen zen ikusi eta haien egoerari ahalik eta konponbiderik egokiena emateko luzapena eskatzen zeneko hari.
Orduan ez bezala, Udaleko langileen oraingo idatziak, duela hilabetekoak baino firma gutxiago dituenak, SASFALi bai ala ez, Gizarte Segurantzari bai ala ez planteatzen du.
Labur esateko, Mitxelena jaunak esandakoa da, apirilean eskatutako 1.go luzapeneko asmoa, zenbait langileri Gizarte Segurantzara pasatzeak ekarriko lizkiokeen eragozpenak zuzendu edo bideratzeko behar den denbora izan beharra zegoela alegia, eta oraingo eskakizuna, beste luzapen bat besterik eskatzen ez duena, bereizi egin behar direla. Esanez, emanez gero, seguru asko, beste luzapen berri bat eskatuko luketela.
Azaldu duenez, Mitxelena jaunak luzapen eskabidea ez onartzea eta langileak ekainaren 1.gotik aurrera Gizarte Segurantzan sartzea proposatzen die zinegotziei, eta bajan edota tratamentuan dauden langileei beste bide batetik ematea konponbidea.
Martiarena jaunak Mitxelena jaunari erantzun dio, esanez ez duela ulertzen nola orain hilabete 1.go luzapenaren aldeko botoa eman zuen eta orain 2.goa ez onartzeko proposamena egin duen.
Mitxelena jaunak erantzun dio, haren ustez garbi utzi duela 1.go eta 2.go luzapenen asmoak ez direla berak. Alegia, 2.goan eskatzen dena SASFALen alde ala kontra, Gizarte Segurantzaren alde ala kontra hitz egitea dela, eta aurreneko hartan, berriz, zenbait langile zer egoeratan geldituko zen ikusteko edo haien egoera bideratzeko hilabete bat eduki beharra eskatzen zela.
Martiarena jaunak dio eskaera hilabeteko luzapena eskatzeko bestetarako ez dela, bajan dauden langileen egoera ezertarako ere aipatu gabe.
Hurrena, Garbizu jaunak hartu du hitza, eta esan du, haren ustez, orain hilabete hartutako erabakia bajan zeuden langileek zeukaten egoerak eragina zegoela, eta baita Udal handiek har zezaketen erabakiak ere, haiek baitira SASFALen pisurik handiena dutenak. Alderdi horretatik, logikoa iruditzen zaio hilabeteko luzapena eskatzea, erabakiorrak diren Udalek zer jokabide hartzen duten ikusi artean.
Urrestarazu andreak adierazi du, orain hilabete bi hilabeteko luzapena eskatu izan balitz, seguru aski eman egingo zela.
Dozagarat jaunak galdetu du ea azkenean zer lortzen den hilabeteko luzapen honekin.
Alkateak erantzun du, Donostiako Udalak eta Diputazioak ekainaren 20a baino lehenago erabakiren bat hartuko dutela, eta erakunde horiek SASFALen aktibo gehiago dituztela. SASFALen errentagarritasuna erakunde horiek SASFALen barruan ala handik kanpora egotearen baitan dagoela, eta, azken batean, datu horrek zehazten duela langileak ordaindu beharko duen kuota.
Azkeneko, Alkateak esan du, Donostiako Udalak eta Diputazioak SASFALetik ateratzea erabakitzen badute sistima ez litzatekeela errentagarria izango, horiek SASFALen jarraituz gero, ordea, beste Udaletako langileek SASFALen jarritzeko ordaindu beharrekoa zehaztu ahal izango litzateke.
Dozagarat jaunak galdetu du ea daitekeena den SASFALen osasun zerbitzua eta Gizarte Segurantzakoa, biak batera, edukitzea.
Alkateak erantzun du hori ezinezkoa dela, bata ala bestea aukeratu egin behar dela.
Dozagarat jaunak SASFALekin jarraitu daitekeen galdetu du.
Alkateak baietz erantzun du, baina Donostiako Udalak eta Diputazioak erabakiren bat hartu arte ez dela Udalak zer kuota ordaindu behar duen jakiterik izango.
Urrestarazu andreak hartu du hitza, eta esan du, SASFALek jarraituko balu eta, okerrenean ere, OSAKIDETZA baino garestiagoa izango balitz, langile bakoitzak aukera izango lukeela bere kuota ordaintzeko, eta, hartara, Udalak bere kuotari eusteko bidea izango lukeela.
Alkateak erantzun du Langileen Asanbladak erabaki bat hartu beharko duela, langile guztientzat, eta ez dela onartuko banakako posturarik, eta erabaki hori izango dela behin betikoa.
Segidan, Mitxelena jaunak hartu du hitza, eta zinegotziei luzapen eskaera hau aintzakotzat ez hartzea eskatu die, orain hilabetekoarekin batere zerikusik ez daukalako, eta luzapen hau ez onartzea erabakiz gero, ekainaren 1.gotik aurrera langile guztiak Gizarte Segurantzan sartuta izango direla. Udal honi geldituko litzaiokeen zirrikitu bakarra, eta ez Udalaren erantzunkizunagatik, SASFALenagatik baizik, tratamenduan daudenak tratamentua behar duten denboran SASFALen bitartez izan dezaten Udalbatzan planteatzea litzatekeela.
Horrek, bajan dauden langileek tratamentua SASFALen bitartez jasotzea esanahi du, harik eta alta hartu arte. Zilegi eta logiko dena, bestetik.
Boto jaunak hartu du hitza, eta aurrena esan du, hari broma bat iruditzen zaiola gai hau festetan erabaki behar izatea, eta lotsagarria iruditzen zaiola premiazko bilera egitea gai honekin; eta hurrena esan du, haien jarrera garbi zegoela hasiera-hasieratik, besteak baino gehiago den inor ere ez duela egon behar alegia, guztiak berdinak direla, eta guztiak Gizarte Segurantzan egon behar dutela.
Boto jaunak adierazi du ez zaiola iruditzen arazorik ez duen inortxo ere dagoenik, gaixoak eta gaixorik ez daudenak, eta gaixo dagoenari, era batera ez bada bestera, konponduko diotela daukan arazoa Gizarte Segurantzan, eta ez zaiola iruditzen hiltzen utziko diotenik, konponduko diotela arazoa, medikuz aldatzea edo horrelako arazo txikiren bat ez bada behintzat.
Boto jaunaren iritziz, hemengo asmoa korporatibismoak funtzionatzea da, eta zer jolas den hau galdetzen du, zeren joan deneko aspaldian Gizarte Segurantza eskatzen aritu izan dira.
Ondo iruditzen zaio Udalbatza egitea, orain edo behar denean, baina arazo hau lehen ere bazegoela dio, eta ea zergatik ez den bilera hau orain astebete egin galdetzen du.
Ondoren, Martiarena jaunak hartu du hitza, eta Dozagarat jaunari lehengo galdera harekin (Gizarte Segurantzan eta SASFALen bietan batera egon daitekeen galdetu duen harekin) zer esanahi zuen esan dio.
Dozagarat jaunak erantzun dio, haren esanahia argi asko dagoela, baldin eta Udala kuota bat ordaindu behar duen enpresa bat dela kontuan izanez gero behintzat, eta horregatik, Gizarte Segurantzan egonez gero, kuota patronal bat ordaindu behar dela, eta SASFALen egonez gero ere bai. Orduan, han esaten zen ea guztiak Gizarte Segurantzara pasatzea erabakitzea legezko ote zen.
Dozagaraten ustez, gorabeherarik latzena, pasiboak gelditzen diren egoera hori da, bajan daudenena, eta esan du Boto jaunarekin bat datorrela inor besteak baino gehiago ez izate horretan.
Boto jaunak esan du, honez gero jakinda egon beharko litzatekeela bajan dauden langileak zer egoeratan gelditzen diren.
Urrestarazu andreak erantzun du, Donostiako Udalak eta Diputazioak hartzen duten erabakiaren mende daudela beste guztiak, eta Donostiako Udalak eta Diputazioak bi hilabeteko luzapena ematea erabaki zutela.
Alkateak Urrestarazu andrearen postura eta Botorena oso bestelakoak direla esan dio Urrestarazu andreari.
Haren ustez, Boto jaunak gizarte segurantza publikoari eta segurantza pribatuari buruzko iritzia planteatzen du, filosofia mailan; eta Urrestarazu andreak, SASFAL errentagarria izanez gero eta kuotak ere onartzeko modukoak badira, SASFAL mantendu ala Gizarte Segurantza mantendu planteatzen du.
Urrestarazu andreak Alkateari erantzun dio, hasieratik utzi zuela hark garbi hura Gizarte Segurantzaren alde zegoela, ez baita inor besteak baino gehiago izatearen alde. Hala ere, herriaren langileak Gizarte Segurantza Publikora sartzeko erabilitako moduaren kontra dagoela. Azkeneko, herriaren langileak Gizarte Segurantza Publikotik kanpora egotea, beste inor baino lehenago, eta beste langile guztiak hor barruan egon behar izatea harentzat onartezina dela esan du. Ez dagoela ulertzerik edozein enpresarik bere langileak Gizarte Segurantzan sartuta eduki behar izatea eta herriaren langileak, berriz, barruan ez egotea.
Hark dio, bazela garaia horren antzeko zerbait egiteko, diferentziarik egon ez dadin, baina ez zaiola ondo iruditzen dekretu baten bidez gauzak egun batetik bestera egin nahi izatea.
Tratamentuan dauden langileen gainean, berriz, Urrestarazu andreak dio hark garbi dakiela medikuen tratamentuaren aldetik ez dutena sufrimentu berezirik izango, izatekotan ere urdurixeago edo lasaixeago egongo direla, mediku berria ez dutelako ezagutuko, hala ere onartzen du kontuan izan beharreko gorabeherak direna.
Alkateak Urrestarazu andreari galdetu dio ea orain eman ezin zaien tratamenturik emateko modurik izango den ekainaren 30ean.
Urrestarazu andreak erantzun dio orain baino garbiago egongo direla gauzak orduan.
Alkateak erantzun dio ekainaren 30ean erakabiko dena errentagarritasuna izango dela, baina, haren ustez, orain tratamentuan edo egoera pasiboan daudenak ez direla besteak ez bezala tratatuko.
Alde horretatik, Alkateak esan du, gorabehera hori oraintxe bertan konpondu daitekeela, SASFALekin hitzarmen bat eginda tratamendua bukatu arte.
Martiarena jaunak galdetu dio Alkateari ea zergatik ezin den luzapena eman, ea zergatik ez dagoen onartzerik.
Alkateak erantzun dio ea zergatik esan behar zaion baiezkoa luzapenari.
Mitxelena jaunak hartu du hitza, eta bi eskabideen arteko aldea erakutsi du: 1.go luzapenena garbi zegoen egoera pasiboan eta bajan zeudenen tramiteak aztertu eta konpontzeko onartu zela, eta gauzak ahalik eta minik ttikiena emanez egiteko, eta gainera luzapen eske hura 23 langilek sinatua zegoela; oraingo luzapena, berriz, 13 langilek sinatua dago eta orain hilabeteko egoerara itzularazten gaitu, bata ala bestea erabakitzeko puntura.
Martiarena jaunak, EAJren izenean, luzapena onartzeko eskatu dio Alkateari, eta langileei beste hilabete bateko epea emateko, nora joan edo nora sartu jakiteko gestioak egin ditzaten.
Mitxelena jaunak Martiarenaren eskabidea oso ondo iruditzen zaiola esandu du, eta horrelaxe segitzeko esan dio, langileen alde lan eginez.
Dozagarat jaunak hartu du hitza, eta SASFAL galtzekotan zorrak egiten dituelako izango dela esan du, eta zorrak egiten baditu galdu egin beharko dela esan du, hortxe dagoela Gizarte Segurantza, eta pasiboan dauden langileen egoera ondo lotua gelditzen bada, ondo iruditzen zaiola, diferentziarik ez baitu egon behar batzuen eta besteen artean.
Garbizu jaunak esan du ateak ixteko denbora gero ere badagoela, eta hemen eskatutako hilabete gehiago besterik ez dela, eta hilabetean gauza asko egin daitezkeela.
Batzuen eta besteen arteko diferentziez hitz egiten ari direla dio, eta hortxe dagoela ARCEPAFE, ARCEPAFEn gaia dexente ondo lotua dagoela, haren ustez, gai honetan diru kontuak ez duela izan behar konturik nagusiena. Azkeneko, logikoena ateak ez ixtea dela dio, oso erraza dela batzuen eta besteen arteako aldeez hitz egitea, baina, azkenean ere, onartuta daudela.
Boto jauanak hartu du hitza, esanez, orain lehenengo luzapena eztabaidatu zenean erabakitako gauza berberak erabakitzen ari direla, eta hori garbi dagoela ez dela logikoa, zeren, haren ustez, aurreneko luzapena eman zenez, logikoena guztia konpondua egotea zela, baina ez dela deusik konpondu.
Alkateak erantzun du, Herri Batasunak orain hilabete zuen jarrera, luzapena erabaki zutenean, tratamentuan zeuden langileen egoera konpontzeko behar zena edo (zenbait pertsona nola gelditzen zen ikusirik) zela.
Beste kontu bat litzateke hilabete horretan egindakoa eztabaidatzea, izan ere, Herri Batasunak zenbait gestio egin dituela esan du, eta haien taldeari dagokionez Udalaren egoera konpondua dagoela. Beraz, era horretako konponbide bat hartzea ez litzateke arazotsua izango. Ordea, ez dakitela langileak ere tratamentuan daudenen egoera aztertzeko zerbait egin ote duten ala ez.
Esan du, luzapena egoera hori aztertzeko eman zela, eta emandako epea nahikoa baino gehiago zela horretarako.
Azkena, Alkateak esan du, bere taldea gizarte segurantza pribatuaren kontra eta publikoaren aldeko agertzen dela, eta, alde horretatik, bere taldearen jarrera garbi dagoela, eta bere taldearen botoa beste luzapen baten kontrakoa izango litzatekeela. Hala ere, horrek ez duela esanahi, inondik inora ere, tratamentuan daudenen egoera konponduko ez denik, eta hitza ematen duela SASFALekin akordio bat egiteko kasu bakoitza aztertzeko.
Legorburu andreak hartu du hitza, bere taldearen postura zehaztu asmoz. Esan du, alde batetik luzapena ontzat ez ematea litzatekeela haien jarrera, eta Udalak egoera pasiboan, bajan edota tratamentuan, daudenen egoera konpontzeko konpromezua hartzea.
Boto jaunak erantzun du ez dagoela proposamenarekin ados, zeren egon daitezkeen arazoak honez gero konpondurik egon beharko ziratekeen, eta oraindik ere baldin badaude seguruenera Udalaren edo langileen erruz izango dela. Beraz, luzapenaren kontra dagoela.
Mitxelanak jaunak, bestetik, poza hartzen duela esan du Boto jauna banakakoen interesagatik gidatzen ez delako, poza hartzen duela teorian behintzat ados daudelako inolako bereizkeriarik ez dela egin behar horretan. Baina, egon dauden egoerei konponbidea aurkitu behar zaiela esan du (Patxi Apalategi eta José Manuel Alonsoren egoerak aipatu ditu), Legorburu andreak azaldu duen proposamena berriz azalduz.
Boto jaunak erantzun dio haren irudipenek ez dutela batere baliorik. Beretzat, 1.go zatia garbi gelditu dela, baina beste guztiak ez duela baliorik.
Beste partehartzerik ez dagoenez, Alkatetzak botazioa eginarazi du. Botaziotik atera den akordioa akta honen hasieran dagoena da.
Aktaren amaiera.
Eta beste aztergairik ez dagoenez, Alkatetza -Lehendakaritzak, hogei orduak eta bost minutuetan, bukatutzat eman du batzarraldia, nirekin batera bertan diren zinegotzi guztiek sinatzen duten akta hau jasorik, eta nik, Idazkari gisa, hau guztia ziurtatuz.