2007.eko Martxoaren 26ekoa

Lezoko Udaletxeko Biltzar Areto Nagusian, 2007ko martxoaren 26an, 8:35etan, eratu da OSOKO UDALBATZA, EZOHIKOA, egiteko xedez, lehen deialdian, Kepa Garbizu Azkue alkatearen lehendakaritzapean eta ondorengo zinegotzi hauek bertan direla: Iñake Urrestarazu Azurmendi (EA taldea), Mikel Antxon Arrizabalaga Brusín (PSE taldea), Jesus Maria Martiarena Jaka (EAJ taldea), Aroia Goienetxea Egibar (EAJ taldea), Aitor Mimendia Artuzamonoa (EAJ taldea), Enrique Figueroa Laboa (EAJ taldea), Noemí Arberas Osés (EAJ taldea), Ainhoa Villanúa Ayuela (PSE taldea), Isabel López Aulestia (IU-EB taldea), Maria Luz Anglada González (PP taldea) eta Mayra del Carmen Cruz Robelo (PSE taldea).

Bertan da eta egintzaren fede eman du udal idazkaria den Xabier Loiolak.

Patxi Apalategi aritu da itzultzaile lanetan.

1.- Eguneko zentroa eta apartamentu babestuak egiteko proiektuaren eta bideragarritasun azterketa onartzeko proposamena (2006H0120003).

Alkateak, gaia batzordean diktaminatu gabe dagoenez, haren urgente izaera berresteko eskatu dio bilkurari. Batzordean eztabaidatu gabe ekartzea arrazoitu du: tramitazio luzeko espedientea dela, bi hilabete gelditzen zaizkiola korporazio honi eta, egun guztiak aprobetxatu nahi direlako, batzordean aztertu gabe dakarrela gaia. Dena den, joan den ostiralean egin zuten bilera txiki batean gaia esplikatu omen zuen.

Mikel Antton Arrizabalagak dio gaiarekin ados badago ere, ez dagoela ados urgente gisa aurkeztearekin. Dio, epeak eta egunak joaten utzi direla, inongo proposamenik landu eta aurkeztu gabe. Orain, aldiz, berez batzordeak egin beharko lukeen azterketa eta eztabaida saihestuz, korrika eta presaka osoko bilkurara aurkeztea ez zaio zuzena iruditzen eta, horregatik, ez du urgente izaeraren alde bozkatuko.

Mari Luz Angladak dio bat datorrela Mikel Antton Arrizabalagak esandakoarekin.

Urgente izatea bozkatu da eta alde zazpi boto izan dira, alkateak eta EAJ eta EA taldeetako zinegotziek emandakoak, lau boto kontra, PSE-EEko hiru zinegotzienak eta PPko zinegotziarenak eta abstentzio bat, EB-IU taldeko zinegotziarena.

Aitor Mimendiak azaldu du proposamenaren nondik norakoa. Memoria eginez, Auñamendin kokatu nahi zen eguneko zentroa aipatu du eta gaurkoarekin alderatu du. Ordukoa txikia, handitu ezina eta irisgarritasun arazoekin. Gaurkoa handiagoa, handitu daitekeena eta herri-gunean kokatua.

Inbertsioaren kostuari dagokionez, Aitor Mimendiak dio, Eusko Jaurlaritzako Izartu II-ko dirulaguntza jasotzea aurreikusi izan bazen ere, hura eskuratzeko beste erakunde publiko baten dirulaguntza izatea beharrezkoa denez, finantzazio bide hori suspenditu egin dela, aurreikusi ziren 1.800.000 € jaso gabe.

Aurkeztu den proiektua 4.000.000 €takoa da eta Lezon izan den proiekturik nabarmenena omen. Aitor Mimendiak dio, nahiz eta formetan presaka dabiltzan, proiektua heldutasun tekniko handikoa dela eta deskribatu egin ditu eraikinaren atal nagusiak. Dio inbertsio inportantea eta osoa dela, Gipuzkoan bakarra, eta lehenbailehen erabilgarria beharko duela.

Oarsoaldeatik egindako txostenak dioen bezala, soilik apartamentu tutelatuen oinarriko ordainketa egitearekin, argi eta ur kontsumoak ordainduta izateaz gain, 24 orduko zaintza izango dutela. Beste zerbitzu batzuk eskuratu nahi badira, ordaindu egin beharko direla dio. Proposamen honetarako beste udaletxe batzuetako eskarmentua hartu omen dute kontutan.

Aitor Mimendiak dio, metro gutxi batzuengatik ez dituela proiektuak egungo Hirigintza Arau Subsidiarioak errespetatzen eta horrela dioela Udal arkitekto aholkulariak bere txostenean. Huskeria omen da, kontuan izanik onarpen prozesuan diren arau berriek proiektua bere horretan aurreikusten dutela eta, gainera, beste 17.000 m² gehiago onartzen direla espazio libretarako sisteman.

Aitor Mimendiak dio ohore bat dela bideragarritasun plana eta proiektua onartzea, Lezorentzat datozen ehun urtetarako garrantzitsua izango delako.

Mikel Antton Arrizabalagak dio bera eraikina egitearen eta proposatzen den kokagunean egitearen alde dagoela. Baina horrek ez omen du obren eta kontzesioaren finantzazioan dauden argi-ilunak argitzetik urrundu behar. Alderantziz, kontzesioa zenbat urteetarako den eta zergatik, ea apartamentuetarako udalak ez al duen ezer ordaindu behar, eguneko zentroaren gestioa, prezioak zeintzuk izango diren, garajeei buruz ez delako ezer esaten, e.a. . Bideragarritasun txostena osatu gabea omen da, osoa behar lukeenean, obra eta zerbitzuaren lehiaketa arautuko duen baldintza agiria haren baitan idatzi behar delako.

Isabel Lopez Aulestiak dio, ados dagoela azpiegituraren beharrarekin baina ez aurkeztu den iluntasunarekin. Horregatik abstenitu egingo dela.

Mari Luz Angladak dio, ostiralean egindako bozeramileen batzarrean osoko bilkura atzeratzea adostu omen zuten, txostenak osatugabeak zirelako, eta haiek osatzea erabaki zelako. Ostiralean aipatutako gaiak argitu ez direnez (diruak, epeak, ...), bera abstenitu egingo dela.

Jendartetik Aitor Sarasolak hitz egin du. Gogoratu du laster beteko direla lau urte Auñamendin apartamentu tutelatuak, eguneko zentroa eta udal bulegoak egiteko obrak gelditu zirela eta oraindik haren ordezko behar zuen proiektu berriaren tramitazioari hasiera ematen ari dela udala, presaka eta ongi egin gabe, informazio partzialarekin, e.a.. eta horretan denak bat omen datoz. Esan du Auñamendiko ekipamenduak martxan behar zuela eta hura ez gauzatzea rebantxismo politiko hutsa dela. Aldundiak Auñamendiko proiektua %60an laguntzen omen zuen, eta oraingoa berriz %5ean. Gaur aurkezten den asmoa saio desesperatua dela dio, gabezia handiak eta asko dituen bideragarritasun azterlana onartu nahiz. Adibidez, ez omen du eguneko zentroari buruz ezertxo ere esaten, eta egia ez diren esaldiak jasotzen ditu, eguneko zentroa aldundiaren eginkizuna dela esaten denean.

Aitor Sarasolaren iritziz erabakia kaltegarria da Lezoko herriarentzat, 40 urteko epean bederatzi miloi euroko inbertsioa suposatzen duelako, horrek luzaro lotuko baitu udalaren inbertsio ahalmena. Eman beharreko zerbitzuen inguruan galdetu du zein babes duen Aldunditik. Gogoratu du Auñamendirako aurreikusitakoa zela Aldundiak Lezorako aurreikusten zuen gehiengoa, eta orain Aldundiko inongo informerik eta erabakirik gabe zerbitzu handiagoa proposatzean, lekuz kanpo behar lukeen handikeri bat izango zela dio.

Alkateak dio proiektu honek baduela Aldundiaren babesa eta eguneko zentrorako 40 plaza beharko direnaren txostena.

Jendartetik Markos Eizagirrek eskatu du hitza. Markos Eizagirre "Aiton Borda" Jubilatuen Elkarteko lehendakaria da. Berak dio, Lezok, 6.000 biztanleko herria izanik, gaur egun oraindik ez daukala egoitzarik, ezta eguneko zentrorik ere. Hika-mikak alde batera utzi eta herria zain dagoen azpiegiturari aurrera bidea emateko eskatu du. Aspertuak omen daude gai honekin.

Mikel Antton Arrizabalagak dio, Markos Eizagirrek arrazoi duelako eta berak zinegotzi bezala duen ardurarengatik, gaiak aurrera segi dezan, proposamenaren alde bozkatuko dutela berak eta bere taldeak eta ikusiko dela errealitateak arrazoia ematen duen ala ez.

Alkateak Udal Idazkariari galdetu dio ea esatekorik duen, eta honek urtarrilaren 12an egindako txostenean esandakoari eusten diola dio. Proiektuari dagokionez, lurrak hezkuntza erabilera afektatuak daudela oraindik, eta arkitekto aholkulariaren txostena kontrakoa dela, eraikinak ez dituelako betetzen indarrean dauden Hirigintza Arau Ordezkatzaileak eta irisgarritasunaren inguruko aldaketa batzuk beharrezko ikusten dituelako. Bideragarritasun txostenari buruz dio, haren hasieran aipatzen diren 2006an egindako analisia eta hartutako erabakia ez dituela ezagutzen eta espedientean ez daudela. Bere garrantzia baduela aipatu analisi eta erabakiak zeren, Administrazio Publikoko Kontratu Legearen arabera, bideragarritasun azterketaren edukia baita, besteak beste, aukera ezberdinak aztertzea eta haien artean proposamena egitea. Aldiz, aurkeztutako bideragarritasun txostenak ez ditu aukera ezberdinak aztertzen, kontzesio aukera erabakitzat ematen du eta erabat partziala da, apartamentu tutelatuei buruz aritzen delako bakarrik, eraikinaren gainontzekoak (garajeak, eguneko zentroa, jubilatuen egoitza eta taberna, eta udal gizarte zerbitzuetako bulegoak) aztertu gabe utziz, ez obrari dagokionez ez zerbitzuaren ustiaketari dagokionez.

Hirigintza, Obra eta Zerbitzuetako zinegotzi delegatuak egindako proposamena bozkatzeko esan dio Alkateak Osoko Bilkurari. Honela dio proposamenak:

"Lezoko Udalak udalerrian dagoen babes gabe eta adinduentzako zerbitzuen beharrari erantzuna emateko Pildain eskolak zeuden tokian Eguneko zentroa eta apartamendu babestuen zerbitzua eskainiko duen eraikin bat sortu nahi du.

Eraikuntza hau eta eguneko zentroa naiz apartamentu babestuen zerbitzuaren ustiaketa obra publikoaren emakida sistemaren bidez gauzatu nahi denez, obra publiko hau eraiki eta emakida bidez ustiatzeko erabakia hartu baino lehen derrigorrezkoa da Administrazio Publikoetako Kontratu Legearen 227 eta 228 artikuluek xedatzen dutena kontuan izanda aurreproiektu bat eta bideragarritasun azterketa egitea.

AKORDIO PROPOSAMENA:

BAT: Eguneko Zentroa eta Apartamentu babestuen proiektua eta bideragarritasun azterketa onartzea.

BI: Eguneko Zentroa eta Apartamentu babestuen proiektua eta bideragarritasun azterketa hilabetez jendaurrean edukitzea, Gipuzkoako Aldizkari Ofizialean iragarkia argitaratu eta biharamunetik hasita."

Aldeko hamar botorekin, alkatea, EAJ, EA eta PSE-EEko zinegotzienak, eta bi abstentziorekin, EB-IU eta PPko zinegotzienak, proposamena onartu da.

2.- Teleasistentzia zerbitzuaren kudeaketarako enkomienda onartzeko proposamena.

Alkateak dio gaia batzordean diktaminatu gabe ekarri dela, hil honen bukaera baino lehen onartu behar delako. Osoko bilkura osatzen duten zinegotzi guztiek onartu dute urjentzia eta ados daude gaia eztabaidatu eta bozkatzearekin.

Gizarte Zerbitzuetako zinegotzi delegatuak hemen heldu dena proposatu dio Osoko Bilkurari:

"EUDEL eko Elkarteburuak eta Gipuzkoako Foru Aldundiko Politika Sozialeko Diputatuak telelaguntza zerbitzuaren baldintzak zehazteko Lankidetza Hitzarmen Markoa izenpetu dute. Aipatutako akordioaren xedea teleasistentzia zerbitzuaren esparru juridikoa definitu eta ezarri ondoren, Gipuzkoako Lurralde Historikoan prestatzeko oinarriak ezartzea da. Teleasistentzia zerbitzua Udal eskumenen esparruan jasotzen bada ere, beren ezaugarri teknikoak direla eta, gomendagarria da Gipuzkoako Foru Aldundiak kudeatzea. Akordio horretan Gipuzkoako Udalek Foru Aldundiari eskatuko dioten telelaguntza zerbitzuaren kudeaketa lanen oinarriak finkatzen dira eta kudeaketa lanak esleitzeko hitzarmen eredu bat adostu dute, baita zerbitzua emateko araudi bat ere.

Gizarte Zerbitzuetako zinegotzi eskuordeduna naizen aldetik ondorengo proposamena luzatzen diot Lezoko Udaleko Osoko Bilkurari:

BAT: Lezoko Udalak Gipuzkoako Foru Aldundiari teleasistentzia zerbitzua kudeatzeko gomendioa egiten dio eta horretarako I.anexoan jasotako hitzarmena sinatzen du.

BI: Teleasistentzia arautzen duen Udal Araudiari hasierako onarpena ematea. II.Anexoan jasota dago. Jendeaurrean izan ondoren alegaziorik ez bada jasotzen, behin betiko onarpena izango luke. Araudia eransten da.

HIRU: Araudi berriak 2007 urterako ordenantza fiskaletan izan ditzakeen aldaketak jaso ahal izateko erabakiaren berri kontuhartzailetza sailari igortzea, dagozkion ondorioak jaso ditzaten.

LAU: Zerbitzuaren kudeaketa arautuko duen hitzarmena sinatzeko Gizarte Zerbitzuetako delegatu eskuordeduna den Iñake Urrestarazu izendatzea.

BOST: Erabakiaren aurkako errekurtsoak:

a) Auzitara jo aurretik, eskatzaileak, hala nahi izanez gero, erabakia berraztertzeko errekurtsoa aurkez dezake 30/1992 Legearen arabera.

• Horretarako, hilabeteko epea dauka, erabaki honen jakinarazpena jaso eta biharamunetik hasita.
• Errekurtsoa aurkeztekotan Osoko Bilkurara jo behar da.

b) Bestela, administrazioarekiko auzi-errekurtsoa aurkez dezake zuzen-zuzenean.

• Horretarako, bi hilabeteko epea dauka, erabaki honen jakinarazpena jaso eta biharamunetik hasita.
• Errekurtsoa aurkeztekotan, EAEko Auzitegi Nagusiko administrazioarekiko auzitarako Donostiako epaitegira jo behar da."

Proposamena aho-batez onartu da.

Aktaren amaiera.

Beste aztergairik geratzen ez denez, alkate-lehendakariak 9:20etan eman dio buru bilkurari. Eta nik, idazkari naizen aldetik, akta 622.618.etik 622.922.ra arteko zenbakiak dituzten orri ofizialetan jaso eta horren guztiaren fede ematen dut, eta bilkuran izan diren zinegotzi guztiek izenpetu egin dute akta hau.