Ikus-entzunezko emanaldia

Agus Barandiaranek, mundu osoan euskal musika eta dantza tradizionalaren enbaxadore izandakoak, euskaldun batek izan dezakeen amesgaizto latzenari egin behar dio aurre: bere 1540ko baserria eraitsi nahi dute, errepide berria egiteko. Agusek gertakarien aurka jo beharko du bere sustraiak babesten saiatzeko.

Izan ere, euskal kulturan, lau horma baino askoz ere gehiago da “etxea”. 

Basque Selfie istorio tristea da, baina onbideratzailea, eta tradizioa du ardatzean: norberaren ezaugarriak bizirik mantentzeko tradizioa.

• Basque Selfie filmaren fitxa.

Silvia Triguerosek, 42 urte bete berri, ultratraileko probarik gogorrenetako batzuk egin ditu. Tor des Geants 330 kilometroko lasterketa da, 24.000 metro desnibelekoa, Alpeetan, Gran Paradiso Parke Nazionalean eta Mont Avic Parkean barna. Lehen saioan bosgarren izan ondoren, Silvia berriz saiatuko da probaren zailtasunei, batez ere mentalei, aurre eginez.

• Zuzendariak: Mikel Urresti, Iñaki Urresti
• Generoa: Dokumentala
• Iraupena: 40 minutu

Aralarko ondare natural eta kulturalaren leiho izateaz harago, hausnarketa eta gogoetarako bide ematen duen pelikula da. Adituen adierazpenek eta mundu oniriko bateko pasarteek, Nafarroa eta Gipuzkoaren mugan dagoen mendilerro honen balioa ezagutzera ematearekin batera, kontserbaziorako deia egiten dute.

Fitxa

• Ekoizpena: ON Produkzioak eta Landarlan Ingurumen Elkartea
• Zuzendariak: Garazi Auzmendi, Iban Toledo, Aloña Jauregi eta Ion Fontenla
• Argazki zuzendaria: Iban Toledo
• Gidoia: Lorea Agirre eta Idurre Eskisabel
• Irudia, edizioa eta etalonajea: Iban Toledo
• Zuzeneko soinua: Olaia Sanchez, Egoitz Covo, Danel Ciaurriz (Labrit Multimedia) eta Iñigo Azkue
• Soinu posprodukzioa: Labrit Multimedia
• Musika: Pello Ramirez
• Diseinu grafikoa: Arkaitz Barriola
• Iraupena: 85 minutu
• Jatorrizko bertsioa: Euskara, gaztelania eta ingelesa
• Azpitituluak: Euskara, gaztelania, ingelesa eta frantsesa
• Webgunea: www.aralardokumentala.eus

Gure Oroitzapenak egiteko ideia Kubatik bertatik sortu zen. Joseba Sarrionandiaren unibertso literarioa ikus-entzunezkoetara ekartzeko ahalegin bat da. Hamabi zuzendarik hartu dute parte film kolektibo honetan. Hamabi begirada desberdinek osatzen dute filma, zuzendari bakoitzak film labur bana egin baitu. Zuzendarietako bat etorriko zaigu filma aurkeztera.

Joseba Sarrionandiaren aurpegia poliedrikoa da; ez literatura-adierazpideko molde guztiak ukitu dituelako soilik, baita bere iruditeria, ezin konta ahala munduz osatua, sortzeko gai izan delako.

Beraz, literaturaren munduan agertzen diren elementuetako asko agertuko dira hemen, zalantzarik gabe: itsasoa, portua, haurtzaroa, trenak, deserrotzea, ihesa, nora eza, erbestea, gerra, suntsipena, amodioa, deriba, mina, fantasia, misterioa, iniziazioa, tortura...

Fitxa

• Ekoizpena: Adabaki Ekoizpenak (Mikel Arredondo Bilbao, Lutxo Egia del Rio, Hibai Castro Egia - ekoizpenak@adabaki.eus)
• Ekoizpen elkartua: Gastibeltza Filmak (gastibeltza.filmak@gmail.com), Elkar, Zenbat Gara Elkartea
• Ekoizle eragileak: Hibai Castro, Mikel Arredondo, Lutxo Egia
• Ekoizle elkartuak: Anjel Valdes, Jusu Martinez
• Jatorrizko ideia: Angel Azkarraga 'Matxitxa'
• Jatorrizko testuak: Joseba Sarrionandia
• Zuzendariak: Oskar Alegria, Özcan Alper, Asier Altuna, Mireia Gabilondo, Eugène Green, Itziar Leemans, Josu Martinez, Fermin Muguruza, Ane Muñoz, Maider Oleaga, Carlos Quintela, Maialen Sarasua
• Salmentak eta banaketa: Atera Films (info@aterafilms.com)
• Iraupena: 96 minutu
• Hizkuntza: Euskara, gaztelania, kurduera, portugesa
• Filmaren webgunea: gureoroitzapenak.adabaki.eus
  
  

1965eko urrian gaude. New Yorkeko Bosgarren Hiribidean desfilatzeko gonbita jaso du Iruñeko San Ferminetako erraldoien konpartsak. Ezingo dute, ordea, denek desfilatu: arrazagatiko bereizkeria dela kausa, agintari iparramerikarrek debekatu egin dute erraldoi beltzen parte-hartzea.

Benetako gertaera horretatik abiatuta, Muguruzak, Canok eta Alderetek Manex Unanueren historia asmatu dute: erraldoi beltz horietako bat garraiatzeko ardura zuen fikziozko pertsonaia. Bere kideek agintarien erabakiari men egin izana deitoratuz, etxera ez itzultzea erabakiko du Manexek. Gazte honen begietatik izango dugu 1960ko hamarkadaren erdialdean gizartea errotik astindu zuten gertaeren berri: Malcolm X-ren hilketak eragindako kale gatazkak, Warholen faktoriako atmosfera bizarroa, Black Pantherrek Kubako zerbitzu sekretuekin harilkatutako harremana edo hippyen hastapenak, lehen musika jaialdi erraldoietako giro psikodelikoan. Gerra Hotzaren oihartzuna ere agerikoa izango da, alde bietako espioien artean zeuden interes eta katramila ezkutuak tarteko.

Kuban urte batzuk igaro eta trebakuntza berezia jaso ondoren, Manexek Che Guevara ezagutuko du hura Boliviara joateko zorian dela. Egiteko ezinago delikatu batean abiatuko da gero: eraila izateko arriskua duen Black Panther bat AEB Ameriketako Estatu Batuetatik atera eta hari Habanaraino lagundu beharko dio. Horretarako, mundua alderik alde zeharkatu eta itzulinguruz betetako bidaia egingo du. Izan ere, ezinezkoa da bidaia hori zuzenean egitea: CIAk susmoa baitu kubatarrak zoru iparramerikarrean operazio berezietan ote dabiltzan.

Errealitatea eta fikzioa dantzan jartzen dituen intrigazko haria da Black is Beltza, deus falta ez duena: maitasuna, iraultza, espioitza. Eta horren guztiaren lagun, garaiko soinu banda bereizgarria, adierazkortasun grafiko handiz zuzen-zuzenean 1960ko hamarkadako bihotzera eramango gaituena.

• Black is beltza filmaren fitxa