2011ko martxoaren 23koa

Mamia:

Lezoko Udaletxeko Biltzar Areto Nagusian, 2011eko martxoaren 23an, asteazkena, 19:30etan, eratu da EZOHIKO OSOKO UDALBATZA egiteko xedez, lehen deialdian, Haritz Salaberria Goikoetxea Alkatearen lehendakaritzapean eta ondorengo zinegotzi hauek bertan direla: Jon Legorburu Arrastua, María Pilar Legorburu Echegaray, Urko Lopetegi Campano, Jaione Lekuona Irazusta, Kepa Garbizu Azkue, Enrique Figueroa Laboa eta Miguel Antonio Arrizabalaga Brusín.

Ez dira bilkurara etorri Irati Aranburu Salaberria, Iñigo Esnaola Arbiza, Jesús María Martiarena Jaca eta Roberto Sánchez Sánchez.

Bertan da eta egintzaren fede eman du udal idazkaria den Xabier Loiolak.

1.- 2011. ekitaldiko udal aurrekontuaren hasierako onarpena emateko diktamena (2010KO290006).

Alkateak Ogasun batzordearen diktamena onartzea proposatu dio Osoko Bilkurari. Honela dio diktamenak:

2011ko Udal Aurrekontua lantzeko eta onartzeko tramitatzen ari den espedientea ikusirik, Ogasun eta Kontuetarako Batzordeak, 2011ko martxoaren 16an egindako bilkuran, Haritz Salaberria, Jon Legorburu eta Urko Lopetegiren aldeko botoarekin eta Kepa Garbizuren abstentzioarekin, behean heldu den proposamena diktaminatu du Osoko Bilkuran onar dadin:

BAT: Hasierako onarpena ematea 2011. ekitaldiko Udal Aurrekontuari. Hona hemen aurrekontua atalez-atal zehaztuta:

BI: Informazio publikorako hamabost egunetako epea irekitzea, Gipuzkoako Aldizkari Ofizialean eta iragarki oholtzan iragarkia argitaratuz, alegazioak aurkez daitezen.

Alkateak aurrekontu memorian eman dituen azalpenak laburbildu ditu: krisi garaiko aurrekontuak direla, gastuari eutsiz egindakoak. Diru sarrera arruntekin gastu arrunterako adina egiten dela eta ez dela aurrezten. Arrazoi, horregatik inbertsioek iazko aurrekontu itxierako emaitzen zain egon beharko dutela dio.

Kepa Garbizuk dio orokorrean panorama ez dela alaia. Gastu eta sarrera arruntetan asko jaitsi dela. Orokorrean aurkeztutako proposamena ondo planteatua dagoela dio. Hala ere, ontzat emateko arazoak dituela. Eta horien artean aipatu du martxan jarriko diren apartamentu babestuentzako aurreikusitako 3.000 €-ak, aurreikuspen baxua da. Bere ustez, aurreikuspen horrekin ezingo dira apartamentuen araudian eta gizarte zerbitzuetako batzordeak joan den irailean egindako batzordean aurreikusitako zerbitzuak eman. Alkateak esan dio ez dela erraza gastu honen zenbatekoa orain zehaztea zerbitzu berria delako. Dena den, hasteko nahikoa dela dio, espazio komuneko garbiketa eta argi gastuetaz ari garelako, eta udal eraikin guztien garbiketaren eta energiaren gastu partidak binkulatuak daudelako. Hau da, posible da eraikin batzuetan gastua gehitzea eta beste batzuetan gutxitzea.

Mikel Antxon Arrizabalagak gutxi aurrezten delako inbertsioak oso mugatuak gelditzen direla dio. Ez dago ados proposatutako gastu batzuekin. Bai beste batzuekin, eskoletako jangela handitzearekin adibidez. Horregatik abstenitu egingo da.

Bozketa egin da eta diktamena onartu egin da aldeko bost botorekin, aurkako birekin (Kepa Garbizu eta Enrique Figueroa) eta abstentzio batekin, Mikel Antxon Arrizabalagarena.

Alkateak gogoratu du zein den onarpen prozedura eta dio jendaurreko epean alegaziorik ez balego behin betiko onarpen erabakia automatikoa dela.

2.- Oarsoaldea S.A.ren 2011ko kudeaketa plana eta aurrekontua onartzeko diktamena.

Alkateak Ogasun Batzordeak onartutako diktamenari zuzenketa bat egin behar zaiola dio. Oarsoaldea S.A.k aste honetan bertan bidalitako dokumentuen arabera Lezoko Udalak egin beharreko ekarpenak 284.898,81 €-koa izan beharrean 281.926,58 €-koa beharko luke. Zuzenketa horrekin diktamena onartzea proposatu dio Osoko Bilkurari. Honela dio diktamen zuzenduak:

"Alkate lehendakariak, Oarsoaldea S.A.ren 2011ko kudeaketa plana eta aurrekontuari buruz aurkeztutako proposamena eta horri buruz kontu hartzaileak egindako txotena ikusirik,

Kontu eta Hazienda Batzordeak, 2011/03/16an egindako bilkuran, Haritz Salaberria, Jon Legorburu eta Urko Lopetegiren botoa alde dela eta Kepa Garbizu zinegotziaren abstentzioarekin

Diktaminatzen du:

BAT: Oarsoaldea S.A.ren 2011 ekitaldirako kudeaketa plana eta aurrekontua onartzea, zenbatekoa 281.926,58€ (AD-98) delarik.

BI: Aipatutako kudeaketa planaren tramitaziorako, Alkate-lehendakaria ahalmentzea."

Kepa Garbizuk dokumentazioaren kopia bat eskatu du.

Diktamena aho-batez onartu da.

3.- 2011. urteko plantila organikoa eta lan postuen zerrenda hasieraz onartzeko diktamena (2011PE290001).

Jon Legorburuk Barne Batzordeak onartutako diktamena onartzea eskatu dio Osoko Bilkurari. Horretarako aurrez azaldu ditu iazkoarekin konparatuta aurtengoak dituen aldaketak:

• - Musika Eskolako administrari laguntzailearen lanaldiaeguneratu egin da 35 orduko lan jarduneko asteari. Lehen 6 ordu lan egiten zituen asteko 32 orduko lanaldiarekin, eta orain 6h 28 min. egin behar ditu asteko 35 orduko lanaldiarekin.
• - Teknikari laguntzailearen lan postua desagertu egin da (Xabier Fernandezek betetzen zuena Hirigintzako bulegoetan), eta berriro Brigadako Ofizialarena sortzen da, %20 dedikazioarekin.
• - Bake Epailearen administrari laguntzailearen lanpostuaren lanaldia, %36ko dedikaziotik; %40kora pasatzen da.
• - Kontuhartzailetzako, Errenta, Zerga-bilketako eta Gizarte Zerbitzutako administrari lanpostuei 2. hizkuntza eskakizuna ezartzea. Modu horretan, gaur egun zerbitzu aldian lanpostu horietan aritzen diren udaleko administrari laguntzaileak, administrari plaza horiek eskuratzeko egin beharko lituzketen barne sustapeneko probetara aurkezteko aukera izan dezakete.

Alkateak dio hizkuntza eskakizunen aldaketa proposatu dela salbuespeneko egoera bati aurre egiteko, hau da, gehiegi luzatu den zerbitzu aldia erregularizatzeko. Erregularizazio hori barne sustapeneko aukeraketa bidez egin behar da eta horietara aurkeztu ahal izateko hizkuntza eskakizunak jaitsi egingo dira, bestela ezingo lukete aurkeztu eta. Azken finean, diktamenak, udalean dugun errealitatea jaso besterik ez duela egiten dio eta Udaleko euskara zerbitzuak, erabilera planak, euskara dinamizatzaileak... arlo hau landu beharko dutela eta aipatu lan postu horiek betetzen dituzten langileekin ardura berezia izan, hizkuntza erabilera bermatua izan dadin.

Honela dio onartzea proposatzen den diktamenak:

"Indarrean dagoen legerian oinarrituta, tokiko korporazioari dagokio urtero onartzea aurrekontuaren bidez, udal plantila organikoa eta lanpostuen zerrenda.

Horiek horrela, Haritz Salaberria, Jon Legorburu eta Urko Lopetegiren aldeko botoekin Barne Batzordeak 2011-03-16an egindako bileran, behean heldu dena diktaminatu du, Osoko Bilkurak onar dezan:

BAT: 2011. urterako udal plantila organikoa hastapenez onartzea.

BI: 2011. urterako lanpostuen zerrenda hastapenez onartzea.

HIRU: Erabaki hau tramitezkoa denez ezin da bere aurka errekurtsorik jarri."

Kepa Garbizuk dio proposatutako aldaketekin ados dagoela, baina iazko plantillan arkitektoa eta elektrikari plazak sortzeko egin ziren aldaketekin ados ez zeudenez, abstenitu egingo dela.

Diktamena bozkatu eta onartu da aldeko zazpi botorekin eta bi abstentziorekin (Kepa Garbizu eta Enrique Figueroa).

4.- Lezoko emakume eta gizonen arteko lehenengo berdintasun plana onartzeko proposamena (2011GZ190004).

Alkateak dio gaia diktaminatu gabe dagoela, urgentziaz aurkeztu dela Osoko Bilkurara, planaren kudeaketarako diru laguntza eskatzeko epea gaur bukatzen delako eta plana onartua izatea baldintza delako.

Urgentzia aho batez onartu da.

Alkatearen proposamenak honela dio:

"Ikusirik txosten teknikoa, eta Daiteke enpresak aurkeztu duen dokumentua ikusirik, Alkatetza honek Udal Batzarrera darama erabaki proposamena:

BAT: Onartzea Daiteke enpresak, 2010. urtean egin duen Lezoko Emakume eta Gizonen arteko lehenengo berdintasun plana 2011-2014.

BI: 2011.urtean plan hori martxan jartzen hastea, betiere, hori egiteko eskatuko den dirulaguntzaren baitan.

Proposamena aho-batez onartu da.

Alkateak dio Gizarte Zerbitzuetako batzordea deituko dela plana azaltzeko.

Aktaren amaiera.

Beste aztergairik geratzen ez denez, Alkate-lehendakariak 20:00etan eman dio buru bilkurari. Eta nik, idazkari naizen aldetik, akta 885.772tik 885.775.ra arteko zenbakiak dituzten orri ofizialetan jaso eta horren guztiaren fede ematen dut, eta bilkuran izan diren zinegotzi guztiek izenpetu egin dute akta hau.