2004.eko Abenduaren 1ekoa

Lezoko Udaletxeko Biltzar Areto Nagusian, 2004ko abenduaren 1ean, 8:30etan, eratu da OSOKO UDALBATZA, OHIKOA egiteko xedez, lehen deialdian, Kepa Garbizu Azkue alkatearen lehendakaritzapean eta ondorengo zinegotzi hauek bertan direla: Iñake Urrestarazu Azurmendi (EA taldea), Mikel Antxon Arrizabalaga Brusín (PSE taldea), Jesus Maria Martiarena Jaka (EAJ taldea), Aroia Goienetxea Egibar (EAJ taldea), Aitor Mimendia Artuzamonoa (EAJ taldea), Enrique Figueroa Laboa (EAJ taldea), eta Maria Luz Anglada Gonzalez (PP taldea).

Ez dira bilkurara etorri Aitor Ocerín Ibáñez (EA taldea), Isabel López Aulestia (IU-EB taldea) ezta Ainhoa Villanúa Ayuela (PSE taldea).

Bertan da eta egintzaren fede eman du udal idazkaria den Xabier Loiolak.

Patxi Apalategi aritu da itzultzaile lanetan.

1.- Egoki irudituz gero, urriaren 6an osoko bilkurako akta onartzea.

Akta ahobatez onartu da inolako zuzenketarik gabe.

2.- Diktamena: 2004 urterako soldaten igoerei buruzko erakunde arteko hitzarmena.

Kepa Garbizu alkateak, Pertsonal eta barne gaietarako batzordeak aurkeztutako diktamena onartzea proposatu dio Osoko Bilkurari. Honela dio onartzera aurkezten den diktamenak:

? Lezoko Tokiko Gobernu Batzarraren ordezkariek, Lezoko Udaleko Negoziazio Mahaira aurkeztu zuten, EUDELeko Batzorde Eragilean, 2004ko ekainaren 17an, 2004. urteko soldaten igoerei buruz sinatutako erakunde arteko akordioa. Langileen ordezkariek, bere aldetik, beste proposamen bat aurkeztu zuten.

Lezoko Udaleko Negoziazio Mahaian ez zen inongo akordiorik lortu.

Ondoren, EUDELek proposatutako akordioa 2004/11/24an egindako Pertsonal eta Barne Batzordean aurkeztua eta diktaminatua izan zen, Kepa Garbizu Azkue, Iñake Urrestarazu Azurmendi, María Luz Anglada González eta Jesus Mari Martiarenaren aldeko botoekin.

Horiek horrela, Osoko Bilkurari behean heldu den AKORDIOA hartzea proposatzen zaio:

BAT: 2004. urterako soldaten igoerari buruzko erakunde arteko hitzarmena onartzea.

BI: Hitzarmen hori 2004ko urtarrilaren batetik 2004ko abenduaren 31ra arte egongo da indarrean.

HIRU: Oro har, 2004. urterako soldatak %2 igoko dira, Lezoko Udaleko langileentzako 2003ko urteko soldata osoen aldean.

LAU: Aurrean azaldutakoa alde batera utzita, 2004. urtean langile horiei banan-bana ezarriko zaie lanpostu-mailako osagarriak aparteko ordainsarietan duen eraginaren gehikuntza, aplikatu beharreko oinarrizko aurrekontu-legerian aurreikusitako zenbatekoaren arabera eta lan-kontratuko langileei dagokien kopuru berean.

BOST: Era berean, ezarri beharreko oinarrizko aurrekontu-legerian xedatutakoaren arabera, fondo gehigarria eratzen da, helburuak betetzeko hobekuntza nabarmenak eta lanpostuen eragingarritasuna eta erantzukizuna handitzeko jarduera nabariak saritzeko.

SEI: 2004. urtean, pentsio-planetara egiten diren ekarpenei eutsiko zaie. 2004. urteari begira, hirugarren eta laugarren erabakietan aurreikusitako soldata-igoerei dagokien zenbateko orokorra erakundearen soldata-multzoaren %1,2koa izango da gehienez ere.

ZAZPI: Langileen gainerako lan-baldintzei dagokienez, aurreko hitzarmenetako homogeneotasun-parametroei eutsiko zaie.?

Alkateak dio, seigarren atalean aipatzen den igoera zehaztu nahian, langile bakoitzari gaurko soldataren %1,2 igotzea suposatu nahi duela, batzordean aipatu zen bezala. Hori horrela erabakitzea eskatu die bilkura-kideei.

Alkateak egindako zehaztasun horrekin onartu da diktamena aldeko zazpi botorekin eta abstentzio bakarrarekin, Mikel Antxon Arrizabalagarena, esan duenez, akordioaren zazpigarren atalarekin ez baitago ados, batik bat indarrean dagoen lan saioarekin.

3.- Diktamena: Errenteria eta Lezoko Udalen arteko lankidetza-hitzarmena Altzate eremuaren inguruan.

Hirigintza, Obra eta Zerbitzuetako batzordeak aurkeztutako diktamena onartzea proposatu dio Alkateak Osoko Bilkurari. Honela dio onartzera aurkezten den diktamenak:

?Hirigintza, Obra eta Zerbitzuetako batzordeak 2004ko azaroaren 24an egin zuen batzarraldia.

Hartan tratatu zen, besteak beste, puntu hau: Errenteria eta Lezoko Udalen arteko lankidetza hitzarmena Altzate eremuaren inguruan.

Hirigintzako teknikariak eta arkitekto aholkulariak egindako txostenen berri eman zen eta, elkarren segidan, honela diote:

?Errenteriako Udalak, Altzate eremuaren ingurua garatzeko Errenteria eta Lezoko Udalen arteko lankidetza hitzarmen baten eredua igorri du. Hitzarmen honek laburbilduz zera jasotzen du:

Batetik Errenteriako Udalak Lezoko Udalerriaren eremuan dagoen Altzate gunearen inguruko Arau Subsidiarioen aldaketa proiektua idatziko du Lezoko Udalak onar dezan. Aldaketa horren helburua, gune horretarako Errenteriak bere Plan orokorrean onartu dituen hirigintza zehaztapenak Lezoko Udalerriaren eremura zabaltzea litzateke. Lezoko udalak Arau Subsidiario aldaketa hau tramitatu beharko luke.

Bestetik Altzate gunearen garapenerako etorkizunean onartzea egoki ikusten den Barne Erreformarako Plan Bereziaren hasierako eta behin behineko onarpena Lezoko Udalak Errenteriakoaren eskuetan uzten du, izapidea arinagoa izan dadin.

Administrazioen arteko lankidetza teknikoa, ekonomikoa eta administratiboa orokorrean aurreikusia dago 7/1985 Legearen 57. artíkuluan. Marko horren barruan beraz, legeak aitortzen die Lezo eta Errenteria bezalako udalei euren eskuduntzen arloan lankidetza hitzarmenak izenpetzeko ahalmena.

Lankidetza hitzarmenaren edukiari buruz ondorengo atal hauek azpimarra daitezke:

1.) Arau Subsidiarioen aldaketa puntual bati ekitea aurreikusten da Lezoko Udalerriaren mugetan dagoen Altzate eremuan, Arauen berrikuspen prozesua hasi berria dagoenean.

Lankidetza hitzarmenean ez da aski justifikatzen zer dela eta Lezoko Udalean Arauen Berrikuspen prozesuarekin hasi bezain azkar, hau da, Lezoko Udalerriaren (bere osotasunean) lurralde ereduari buruz eta hirigintza egiturari buruz eztabaida prozesua hasi denean, lurralde horren zati bati buruzko aldaketa, kasu honetan eraldaketa, azkartu behar den. Are gehiago, proposatzen den arau aldaketa puntualak Lezoko Udalerriaren lurralde ereduan eragin nabarmena izango duenean eta aldaketa honek berak arauen berrikuspena bera baldintzatuko lukeenean.

Lezoko Udalerriaren interes orokorrak aldaketa horren azkartzearekin zer irabaziko duen ez da aski argitzen lankidetza hitzarmen horretan. Kontuan izan behar da mugakide den Errenteriako Altzate eremuan udal honek arau ordezkatzaileen berrikuspen prozesuaren barruan egin dituela hirigintza planteamendu berriak eta, orain, Errenteriak xedaturiko zehaztapenei egokitzea eskatzen zaio Lezoko Udalari, bertako beharren azterketa egiteke dagoenean.

2) Arauen Aldaketa puntuala ala Berrikuspena

Arestian esan bezala, lankidetza hitzarmenean aurreikusten den arauen aldaketa puntuala baino eraldaketa baten aurrean gaude. Hitzarmenari bateratzen zaion hirigintza fitxak berak aldaketa substantziala bezala deskribatzen du eremu horretan aurreikusi nahi den hirigintza erregimen berria.

Planteatzen den aldaketak ez du lurraren sailkapena aldatzen, bai ordea 14.233 metro karratuei eragiten dien kalifikazioa eta erabilera, industri gune bat dena edo zena egoitza erabilerarako xedatu nahi baita. Ez dakit aldaketa honek zenbateraino suposatuko duen Lezoko Udalerriarentzat lurralde eredu berri bat edo hirigintza egitura berri bat, zehaztu gabeko kontzeptu juridikoak baitira hauek eta gehiago dira arkitekto baten arloko gaia jurista batena baino. Dena den, argi utzi behar da aldaketa baten izenean benetako arau berrikuspen bati ekitea ez dela zilegi, prozesu erabat desberdinak baitira. Egun indarrean dauden arau subsidiarioetako lurralde ereduarekiko, eredu berri bat suposatzen duen egitura eraldaketa baten aurrean bagaude, ez gaude arau aldaketa soil baten aurrean, berrikuspen baten aurrean baizik.

3) Hitzarmeneko hirugarrengo klausulan, Altzate gunearen garapenerako etorkizunean onartzea egoki ikusten den Barne Erreformarako Plan Bereziaren hasierako eta behin behineko onarpena, Lezoko Udalak Errenteriakoaren eskuetan uzten du, Lezoko Udalari edukia ezagutarazi ondoren, izapidea arinagoa izan dadin.

Nire ustez, gauza bat Barne Erreformarako Plan Berezia izango den dokumentuaren izapidea bakarra izatea eta Errenteriako udalak aurrera eramatea da, baino horrek ez du esan nahi Lezoko Udalak dokumentu horren edukia, ezagutu ez ezik, onartu ere egin behar ez lukeenik, nahiz eta ez izapidetu. Txosten hau izenpetzen duenaren iritziz, Lezoko udalak ere onartu egin beharko luke dokumentua.

Amaitzeko, lankidetza hitzarmen hau osoko bilkurak onartu behar du organo eskuduna bera baita 7/1985 Legeko 22 atalaren arabera?.

?Altzate aldearen garapenaren inguruan Errenteriako Udalaren eta Lezoko Udalaren arteko elkarlan hitzarmen proposamenari dagokion txostena.

Txosten honen xedea Errenteriako Udalak egindako hitzarmen-proposamena aztertzea da, Altzate inguruaren garapena bideratzeko zeren, haren ezaugarriak direla eta, Errenteriako eta Lezoko udalerrien artean kokaturik dagoen eremua izaki, beharrezkoa suertatzen baita udalerri bietako planeamenduak bateragarri egitea.

Horren ildotik, Errenteriako Udala konprometitzen da eremu hori garatzeko beharrezko Arau Ordezkatzaileen Aldaketaren Aurrerapen dokumentua, hasierako onarpenekoa eta, behar balitz, testu bateratua idatzi eta Lezoko Udalari aurkezteko, horrek bere aldetik hura tramita dezan, besteak beste hilabeteko epea jarriz, Uren Zuzendaritzaren aldeko txostena jasoko denetik kontatzen hasita, hasierako onarpena emateko eta jende aurrean jarrita edukitzeko tramiteari ekiteko, eta bi hilabetetako epea hari behin-behineko onarpena emateko.

Garapen planeamendurako, halaber, Lezoko Udalaren aldetik akordio bat hartzea proposatzen du, planeamendu horren tramitazioa Errenteriako Udalari eskatzeko.

Hitzarmen proposamena azterturik, eta dagokion txosten juridikoa edozein delarik ere, seinala daiteke ezen, aurkeztutako proposamena zuzentzat jotzen dela, dena den jakinekotzat ematen delarik ezen, dagozkien onarpenetarako aurkeztu baino lehen, nahiz Aurrerapen dokumentuak nahiz behin-betikoa edo hasierako onarpenerako eta, behar balitz, testu bateratua, horiek aurrez Lezoko Udalari entregatu behar zaizkiola, udal zerbitzu tekniko eta juridikoek azter ditzaten. Era berean, behin-betiko dokumentua onartzeko ezarritako hilabeteko epea hastapenez bi hilabetetara luzatu beharko litzatekeela?.

Hirigintza, Obra eta Zerbitzuetako batzordeak, Jesus Mari Martiarena (EAJ), Iñake Urrestarazu (EA), Maria Luz Angladaren (PP) aldeko botoarekin, aho batez onartu zuen ondorengo DIKTAMEN hau Udalbatzari onarpenerako aurkeztea:

BAT: Errenteria eta Lezoko Udalen arteko lankidetza hitzarmena, Altzate eremuaren ingurukoa, onartzea, azalpenen partean adierazten diren bi txosten zehatzetako iritziei loturik.

BI: Hitzarmen hori izenpetzeko Alkatea ahalmentzea.?

Alkateak dio, diktamenean jasotako txostenetan aipatzen diren aldaketak hitz egin direla Errenteriako udaleko arkitektoarekin, hain zuzen, arau aldaketaren arrazoiak gehiago motibatu beharra, hasierako onarpenerako bi hilabete izatea, eta ez bat, eta plan berezia Lezoko udalak ere onartu egin beharko duela.

Mikel Antxon Arrizabalagak galdetu du ea zergatik ez diren dokumentu honetan jaso aprobetxamendu urbanistikoaren %10aren uzteari buruzko zehaztasunak edota babes ofizialeko etxebizitzei buruzkoak, etab.. Alkateak dio, hori aurrerago egingo dela.

Jendartetik Aitor Sarasolak hartu du hitza eta gogoratu du, dokumentu horrek errespetatzen dituela Lezoko udalak 2003ko maiatzean onartutako Arau Subsidiarioen Aurrerapeneko irizpide nagusiak. Bere ustez, aldaketa puntual bat baino gehiago da proposamena, herrian eragin handia izango duelako, ez bakarrik Campsa desagertuko delako, baizik eta, baita Lezoko Larrañaga eta Lobato etxe inguruetako berrantolaketa suposatuko duelako ere. Horregatik, horrek duen garrantziagatik, salatu du txostenetan ez dela alderatzen Errenteriak proposatutakoa Lezok onartu zuen Aurrerapen dokumentuarekin, eta ez dela egiten gaur egun lantzen ari den Aurrerapen dokumentu berriaren inongo aipamenik ere.

Aitor Sarasolaren iritziz, nabarmena da testuan Errenteriako udalaren prepotentzia, hark markatzen baititu irizpideak eta dokumentuak, Lezori kasu batzuetan haiek beste gabe onartzea eskatzen diolako eta, beste kasu batzuetan, onartzen ere ez diolako uzten. Bere ustez, Lezoko udalak bere nortasuna eta tokia berreskuratu behar ditu kontu honetan, eta Errenteriaren pare dokumentuak landu eta onartu.

Aitor Sarasola ez dago ados hitzarmenaren 1go atalean ?Estudio de Impacto Ambiental? delakoa ez dela egin behar esatearekin. Kontu hori legeak zehazten omen du, eta ez hitzarmen horrek, eta arau aldaketa tramitatzerakoan Aldundiak eskatu egingo duela dio. Aipamen hori kentzearen aldeko azaldu da aipatutakoarengatik eta, batik bat, lur horiek gaur egun duten erabilerarengatik.

Azpimarratu du, hizkuntza ere inposatu egin duela Errenteriako udalak, gaztelera hutsean bidali baitu hitzarmena. Gogoratu dio alkateari, Lezoko euskara araudiaren arabera, dokumentu hori bueltatu egin beharko zukeela.

Jendartetik Mikel Mitxelenak bere inpotentziaren testigantza utzi nahi izan du, Lezoko udalak Errenteriakoaren aurrean duen jarrera pasiboa ikusita, mugen gaiarekin erakutsi bezala, Renfe inguruko errotondaren, aparkamenduen eta trafiko arazoen aurrean. Udal teknikariei eraso horien aurrean erne egoteko eskatu die.

Partehartze hauen ondoren alkateak diktamenaren bozketa proposatu du eta hura aho-batez onartu da.

4.- Diktamena: Eusko Jaurlaritzako, Etxebizitza eta Gizarte gaietako Saileko eta Lezoko Udalaren arteko lankidetza-hitzarmena, etxebizitza hutsen erabilpena bultzatzeko, Bizigune Programari buruzkoa.

Hirigintza, Obra eta Zerbitzuetako batzordeak aurkeztutako diktamena onartzea proposatu dio Alkateak Osoko Bilkurari. Honela dio onartzera aurkezten den diktamenak:

Hirigintza, Obra eta Zerbitzuetako batzordeak 2004ko azaroaren 24an egindako batzarraldian Jesus Mari Martiarena eta Kepa Garbizu (EAJ), Iñake Urrestarazu (EA), eta Maria Luz Angladaren (PP) aldeko botoarekin, aho batez onartu zuen ondorengo DIKTAMEN hau Udalbatzari onarpenerako aurkeztea:

BAT: Eusko Jaurlaritzako Etxebizitza eta Gizarte Gaietako Sailaren eta Lezoko Udalaren arteko lankidetza hitzarmena onartzea, Etxebizitza hutsen erabilpena bultzatzeko Bizigune Programari buruzkoa.

BI: Hitzarmen hori izenpetzeko Alkatea ahalmentzea.

Alkateak dio, sinatutako hitzarmen bat osoko bilkurak onar dezan nahi duela diktamenak. Hitzarmen horrek udalari langile bat prestatu beharra suposatuko omen dio eta urtero zerbitzuaren berri ematearen gastua egitea, eta hori ez omen da aparteko karga. Jarraipen batzorde bat eratuko denez, eginkizun horietarako Jesus Mari Martiarena izendatzea proposatu du.

Jendartetik Aitor Sarasolak dio, espero dutela hitzarmen hori argazkietarako eta sailburuaren propagandatarako ekintza baino zerbait gehiago izatea. Bere harridura azaldu du aurreko urteetan etxebizitza hutsaren arazoarekin hain indiferente, eta batzuetan kontrako ere, izan diren zinegotzi batzuk argazkietan ikusita. Gaiaren inguruan sentsibilitate aldaketagatik bada, ongi etorria dela dio.

Aitor Sarasolari ez zaio ondo iruditzen aurreko urteetan. bai Lezoko udalak bai Oarsoaldeak, gai honetan egindako hainbat ekimen ez jaso izana hitzarmenaren hitz aurrean. Hala gogoratu ditu, 2001an Lezoko etxebizitza hutsen inguruan udalak egindako ikerketa, aitzindari izanez horrelako ikerlanetan, nola 2002an Oarsoaldea Garapen Agentzian aurkeztua izan zen eta nola horiek garatzeko 2003rako Gestio Planean gai hori landuko zuen eskualde mailako bulego bat sortzea aurreikusi zen. Jaurlaritzarekin harremanak ere izan omen ziren.

Aitor Sarasolaren ustez hitzarmenak eredu oso formala azaltzen du, murritza. Gai honetan kargarik gabeko politikak porrot egitera deituak omen daude. Bere iritziz, eraginkor izatea nahi bada, baliabide gehiago jarri behar dira, politika aktiboak bultzatu. Eskualde mailako proposamenari heltzeko eskatu du, Lezo baino dimentsio eraginkorragoa duen esparrua aukeratuz.

Diktamena eta alkateak Jarraipen Batzorderako egindako izendapen proposamena aho-batez onartu da.

5.- Zinegotzi karguaren errenuntzien kontu hartzea.

Alkateak aditzera eman du, Aitor Ocerín Ibáñezek eta Mikel Labandibar Lopetegik, azaroaren 26an, eta 11ean eta 30ean sarrera emandako idatzietan, zinegotzi karguari uko egiteko borondatea azaldu dutela, nahiz eta azken honek, kredentziala bai baina, karguaren jabetza hartu gabe izan.

Indarrean dagoen legeriaren arabera (Hauteskunde Lege Organiko Orokorra, 182., 184f eta 203. artikuluak eta 2568/1986 (AJA) Araudiaren 9.4. artikulua) udalbatzak uko egitearen berri jaso behar du eta ordezkoa izendatzeko izapideak hasi behar ditu.

Udal hauteskundeetako hautetsien zerrenden arabera, Hautesle-Batzorde Zentralari dagokio Miguel María Garbizu Ugalde eta Noemi Arberas Osesen kredentzialak egitea. Hala ere, lehenak, azaroaren 11an eta 30ean erregistratu dituen idatzietan, hautetsien zerrenden arabera legokiokeen zinegotzi kargua hartzeari uko egin dio. Hortaz, Hautesle-Batzorde Zentralari dagokio Noemi Arberas Oses eta Rikardo Salaberria Galarragari (hautetsi-zerrendan hurrengoa) kredentzialak luzatzea.

Horregatik guztiarengatik, udalbatzaren osoko bilkurak hiru uko-egite hauen berri izan du eta, hutsik geratzen diren bi karguak betetzeko, beharrezkoak diren izapideak egiten hasteko agindu du.

Jendartetik Imanol Esnaolak esan du, Lezoren Alde Herri Plataformak aspaldi eskatu zituela bere kargua ez dagokien zinegotzien dimisioak. Dena den, beldur da uko-egite hauek ez ote diren izango errelebo soil bat. Eskatu die alderdiei, inork ez ditzala kargu horiek hartu, eta falta diren dimisioak aurkezteko. Horrela egin ezean, Lezoren Aldek pairatzen duen egoera antidemokratikoa berrestuko luketelako, Lezoko herritar ugariren eta hautetsi batzuen eskubideak baztertuz.

6.- Alkatearen 564. dekretua berrestea.

Alkateak argitu du, ebazpen horren bidez erabaki zela, Kontuhartzailea oporretan den egunetan Udal Idazkaria izendatzea haren eginkizunetarako.

Osoko bilkurak aho-batez berretsi du 564. alkatearen dekretua.

7.- Alkatearen, Organo Kolegiatuetako udal-ordezkarien eta Delegatuen txostenak.

Alkateak banatu dizkie zinegotzi guztiei azken osoko bilkuraz geroztik gaur arte Udalak ordezkaritza duen mankomunitate eta elkarteetan egindako bilkuretarako deialdien kopiak.

Galde eskeetara pasa aurretik alkateak galdetu du ea talde politikoren batek moziorik baduen aurkezteko. Beste inork ez eta, alkateak berak dio, EAJ taldeak Etxeraten izenean Itziar Goienetxeak erregistratutako mozioa aurkezten diola osoko bilkurari eztabaidatu eta bozkatu dezan.

Idazkariak ohartarazi du, gai hori bilkurako gai zerrendan ez dagoenez, horren eztabaida onartzeko aurrez gaiaren urjentzia bozkatu eta onartu beharko dela gehiengo osoaren aldeko botoarekin, 781/1986 dekretuaren 51. artikuluak agindu bezala.

Mozioaren urjentzia bozkatu da eta sei zinegotzik eman dute aldeko botoa, EAJ eta EA taldeetakoek, eta aurka bik, PSE eta PP taldekoek. Mozioa eztabaidatzeko Alkateak egindako proposamenak ez du behar adina boto lortu eta, ondorioz, ezin da gaurko bilkuran eztabaidatu.

Jendartetik Itziar Goienetxeak bere haserrea azaldu du eta alkateari leporatu dio mozio gai zerrendan ez sartu izana, aurrez izandako elkarrizketan agindu ez bezala. Mozioa nahikoa aurrerapenarekin aurkeztu omen du, gaur plenoan ez dagoen IUko zinegotzia den Isabel López Aulestiak agindu omen zion berak aurkeztuko ziola plenoari, baina horren beharrik izango ez zuela eta, orain, ez omen daki nola hartu alkateak bere esku dagoen gai zerrendan sartu ez izana.

Mikel Antxon Arrizabalagari esaten dio, ez duela ulertzen eta onartzen giza eskubideez hitz egiteko gonbitea egin dion zinegotzi batek nola eragotzi dezakeen giza eskubideekin zer ikusia duen eztabaida; ez dio eskatzen mozioa babestea baizik eta eztabaida ez oztopatzea.

Mikel Antxon Arrizabalagak esan dio, alkatearen eskumena dela gai zerrenda egitea eta haren esku dagoela batzar berezia deitzeko aukera ere.

Alkateak bilkura berezi bat deituko duela dio.

8.- Galde-eskeak.

1.- Alkateak urriaren 6ko plenoan erantzun gabe gelditu ziren galderak erantzun behar dituela esan du:

1.1.- Gaintxurizketako errauskailuaren inguruko batzordea eta informazioa biltzeari buruzko galdera ez dagoela erantzunik, baina laster egongo omen da.

1.2.- Algeposako bidearen inguruko galderari erantzunez, dio, urrats batzuk eman direla eta gehiago dagoela emateko oraindik, eta gobernu taldearen asmoa bideen arteko eraztun moduko bat egitea dela.

1.3.- Algeposako estalki mugikorra jartzeko obra baimenari aurkeztutako errekurtsoa zertan den argitzeko egindako galderari dagokionez dio, 170. dekretu bidez erantzunda dagoela, apirilaren 14ean irteera eman zitzaiola erantzunari eta apirilaren 27an jaso omen zen erantzuna.

1.4.- Itturringo ur deposituan egin beharreko obrak noren mesedetan diren argitzeko egindako galderari erantzun dio, esanez, Gobernu Batzarraren azaroaren 17ko batzarrean dagoela erantzuna.

1.5.- Karmen aldapako ur jarioei buruz dio, Gobernu Batzarrak maiatzaren 24ean obra baimena eman zuela haiek konpontzeko.

1.6.- Igerilekuko abala bueltatzeaz, Raimundo Mendibururen txostenaren zain omen dago.

1.7.- Kale-garbiketarako makinaren abala ez bueltatzeko egindako eskaerari buruz dio, aldeko txostenaren ondoren azaroaren 3an erabaki omen dela abal hori bueltatzea.

Alkateak dio, erantzun hauek emanda gero, eta hauetako batzuetan zehaztapenak falta badira ere, erantzuteke zeudenak erantzunda gelditu direla.

2.- Jendartetik Imanol Esnaolak gogoratu du, inork ez duela ekarri bilkura honetara udal ekipamenduei buruzko hausnarketa egiteko Lezoren Aldek aurkeztutako eskaera. Kezkagarria iruditzen zaio gaia eta ez zaio bidezkoa iruditzen lege-aldi oso bat pasatzen uztea; bere ustetan, lege-aldi honetan erantzun behar zaio gaiari, gehiago atzeratu gabe. Eta ekipamendu beraiek egitea ez bada posible, haiek burutzeko plana eta bidea markatzea behar beharrezkoa dela, dio. Horretarako gizarte agenteekin hitz egitea gomendatu du.

Alkateak dio, gai horren eztabaida aurrekontuekin batera egin behar dela eta eztabaida eta erabakiak aurreratzea antzua dela.

Alkateak dio, bazirela beste bi mozio-proposamen erregistratuak, bata Kroke Etxera ekimenarena eta bestea errauskailuaren inguruan ?Lezo Bizirik?-ek aurkeztutakoa. Lehenari buruz dio, EAJ taldearen izenean hitz egiten duelarik, ez zaiela bidezkoa iruditzen herrian hilabete berean bi manifestazio deitzea. ?Lezo Bizirik?-ek aurkeztutakoari laster erantzungo omen diote.

Jendartetik Iker Salaberriak dio, manifestazio kopurua ezin dela izan aitzakia horrelako egoera baten aurrean hitzik ez esateko.

Jendartetik Imanol Esnaolak galdetu dio ea ?Lezo Bizirik?ek aurkeztutakoari idatziz erantzungo zaion. Eta alkateak baietz erantzun dio.

Aktaren amaiera.

Beste aztergairik geratzen ez denez, alkate-lehendakariak 9:30etan eman dio buru bilkurari. Eta nik, idazkari naizen aldetik, akta xxxx.etik xxxx.ra arteko zenbakiak dituzten orri ofizialetan jaso eta horren guztiaren fede ematen dut, eta bilkuran izan diren zinegotzi guztiek izenpetu egin dute akta hau.